Los Ukrainy vyrašycca ŭ najbližejšyja miesiacy

Niahledziačy na pieramirje, štodzień prychodziać paviedam­leńni pra hibiel ci ranieńnie ŭkrainskich sałdat. Štodzień fiksujecca ad 20 da 30 artyleryjskich abstrełaŭ uzdoŭž linii frontu.

Zachad baicca razzłavać Rasiju, tamu zbroi va Ukrainu nie pastaŭlaje. Spadziajucca strymać Pucina pahrozami. «Zachop Maryupala budzie aznačać poŭnaje parušeńnie Minskich damoŭlenaściej», ­— zajavili śpikier polskaha Sojma Radasłaŭ Sikorski i ministr zamiežnych spraŭ Francyi.

Sapraŭdy, nastupnymi metami rasijskaha nastupu mohuć stać Maryupal z dvuma najbujniejšymi mietałurhičnymi kambinatami i Aŭdziejeŭka z koksachimičnym zavodam (vytvorčaść koksu — elitnaha vuhalu z vysokaj ciepłynioj zharańnia, patrebnaha ŭ mietałurhii).

Adnačasova intensifikujucca dyviersanty. Try čałavieki zahinuli ŭ Charkavie ŭ niadzielu. Bombu z dystancyjnym kiravańniem uzarvali ŭ huščy demanstrantaŭ u časie Maršu za adzinstva Ukrainy. Achviarami stali 45-­hadovy padpałkoŭnik milicyi, małady mužčyna, jaki ŭznačalvaŭ inicyjatyvu pa dapamozu ŭkrainskim siłavikam, i 15­hadovy chłopiec.

Ukrainskija śpiecsłužby zajavili, što ślady terarystaŭ viaduć u Rasiju.

Terarysty raźličvajuć, što ŭkrainskaje hramadstva stomicca ad napružanaści. Bo kolki ž možna, sapraŭdy?

Ukrainskija vojski nie mohuć pachvalicca vajennymi pośpiechami. Paraza ŭ Debalcavie była balučaj. Sieparatysty zachapili navat «kontrbatarejnuju ŭstanoŭku» – aparaturu pa vyjaŭleńni miesca, ź jakoha viadziecca artyleryjski ahoń, adzinaje abstalavańnie, što pastavili ŭkrainskaj armii amierykancy. Navat jaho ŭkraincy, adstupajučy, nie zdoleli padarvać.

Padzieńnie ŭkrainskaj ekanomiki za vajenny hod skłała 15%. Kurs hryŭni ŭpaŭ da 32 za dalar, bo ŭ Nacbanka nie zastałosia zołatavalutnych reziervaŭ.

Rasijskija «śpiecy» padbuchtorvajuć ukraincaŭ na bunt suprać Parašenki i Jacaniuka.

Dziela hetaha ŭ internecie raźmiaščajucca miljony «kamientaŭ» ad imia nibyta «zvyčajnych ludziej», zapuskajucca čutki. U raźliku Kramla, unutrany razład kančatkova dabiŭ by Ukrainu i daŭ padstavu dla ŭviadzieńnia rasijskich vojskaŭ u Charkaŭ i Adesu, jakija zastajucca hałoŭnymi celami. Danbas — heta tolki łapik ad žadanaha.

Kijeŭ, u svaju čarhu, raźličvaje stabilizavać situacyju za košt hrošaj Mižnarodnaha valutnaha fondu, što pavinny pryjści ŭ sakaviku. Pazityŭna, što krainie ŭdałosia datrymać da viasny aciapleńnie ŭ damach i padaču elektryčnaści. Piensii i zarobki, choć i źmienšylisia ŭ dalaravym ekvivalencie, ale vypłačvajucca. Dziaržaŭnyja orhany i siłavyja struktury pracujuć.

Kali pravodzić paraleli ź piaredadniem Druhoj suśvietnaj vajny, Ukraina vybrała nie šlach Aŭstryi i Čechasłavakii, jakija prosta zdalisia ahresaru, a šlach Polščy i Finlandyi, jakija supraciŭlalisia. A vynik supraciŭleńnia ŭ značnaj miery budzie zaležać ad abjomu dapamohi sajuźnikaŭ.

• 0
• 0
• 0
• 0
• 0
• 0
• 0
• 0