Piaciora rasiejcaŭ zatrymanyja ŭ Francyi pa padazreńni ŭ padrychtoŭcy terarystyčnaha aktu, paviedamlajuć francuzskija ŚMI sa spasyłkaj na prakuraturu.
Pavodle infarmacyi francuzskich ŚMI, jany byli zatrymanyja ŭ noč z paniadziełka na aŭtorak u haradach Bieźje i San-Žan de Viedas ŭ francuzskim departamiencie Ero, raźmieščanym niedaloka ad mižziemnamorskaha ŭźbiarežža.
Miascovy prakuror Ivon Kalve paviedamiŭ, što minułaj nočču palicyja praviała niekalki rejdaŭ u Bieźje i raźmieščanym pobač z San-Žan de Viedas horadzie Manpielje.
Prakuratura paviedamlaje, što padčas pieratrusu ŭ zatrymanych kanfiskavanyja niejkija pradmiety, adnak padrabiaznaściaŭ niama.
«U dadzieny momant nie ŭstanoŭlena, ci sapraŭdy zatrymanyja mieli namier ažyćciavić napad, — padkreśliŭ prakuror. — Rasśledavańnie jašče tolki pačata — mahčyma, buduć i inšyja zatrymańni».
Hazieta Midi Libre paviedamlaje, što ŭ paniadziełak uviečary ŭ Bieźje byŭ znojdzieny skład vybuchovych rečyvaŭ. Na miesca nieadkładna byli vysłany palicejskija i pažarnyja na vypadak vybuchu, nieŭzabavie byli praviedzieny zatrymańni.
Paviedamlajecca taksama, što za adnym z aryštavanych užo niekatory čas nazirali siły pravaparadku. Jaho imia fihuravała ŭ spravie ab vybuchu ŭ Manpielje 12 listapada 2008 hoda, u vyniku jakoha atrymali ranieńni šeść čałaviek.
Pasolstva Rasii ŭ Paryžy zajaviła, što pakul nie maje infarmacyi ab zatrymańni rasiejcaŭ.
Ciapier čytajuć
Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»4
Kamientary