U Minsku sudom pieršaj instancyi asudžanyja byłyja kiraŭniki sanatoryja «Biełaruś» u Sočy.
Jak paviedamlaje ej.by, vyniesieny pryhavor hramadzianinu Rasii Hieorhiju Sarakašyšu, byłomu dyrektaru sanatoryja «Biełaruś» u Sočy, jaki ŭvachodzić u strukturu Kiraŭnictva spravami prezidenta Biełarusi, jaho namieśniku Alaksandru Kizimu i kiraŭniku sočynskaj budaŭničaj kampanii Andreju Mierankovu.
Zhodna z prysudam usie try zatrymanyja pryznanyja vinavatymi va ŭčynieńni złačynstva, praduhledžanaha č. 4 art. 210 KK (zavałodańnie majomaściu, učynienaje słužbovaj asobaj z vykarystańniem słužbovych paŭnamoctvaŭ, hrupaj asob pavodle papiaredniaj zmovy ŭ asabliva bujnym pamiery). Na padstavie źviestak śledstva, jakija byli paćvierdžanyja padčas sudovaha pasiadžeńnia, abvinavačanyja nanieśli ŭron Kiraŭnictvu spravami prezidenta Biełarusi prykładna na 22 młrd rubloŭ.
Złačynstva było ŭčynienaje padčas budaŭnictva kompleksu adpačynku ŭ pasiołku Krasnaja Palana kala Sočy napiaredadni Alimpijady-2014. Hety kompleks zadumvaŭsia jak častka sočynskaha sanatoryja «Biełaruś».
Alaksandr Kizim i Andrej Mierankoŭ atrymali pa dzieviać hadoŭ pazbaŭleńnia voli, Hieorhij Sarakašyš pryhavorany da šaści hadoŭ źniavoleńnia. Usie jany buduć adbyvać termin u kałonii ŭzmocnienaha režymu. U termin adbyvańnia pakarańnia im zaličycca čas, praviedzieny ŭ SIZA KDB.
Akramia taho, z abvinavačanych pastanoŭlena spahnać naniesieny imi ŭron ŭ 20,6 młrd rubloŭ na karyść Kiraŭnictva spravami prezidenta Biełarusi, a taksama 1,2 młrd — na karyść sanatoryi «Biełaruś». Jašče 1,8 młrd rubloŭ budzie spahnana ŭ jakaści dziaržpošliny ŭ dachod dziaržavy.
Pavodle infarmacyi BiełaPAN, śledstva pa hetaj spravie pravodziła KDB. Kasacyi na pryhavor u Minski haradski sud pakul nie pastupali.
Kamientary