Mašyny zdymačnaj hrupy brytanskaha telešoŭ Top Gear zakidaŭ kamianiami natoŭp arhiencincaŭ. Pa paviedamleńni The Guardian, arhiencincy ŭbačyli ŭ rehistracyjnym znaku aŭtamabila viadučaha Džeremi Kłarksana abraźlivy namiok na padziei Falklendskaj vajny 1982 hoda.
Porsche Kłarksana maje rehistracyjny numar H982 FKL. Arhiencincy, jakija ŭbačyli jaho, paličyli, što tak viadučy vyrašyŭ nahadać miascovym žycharam pra vajnu za Falklendskija vyspy (ličby na im asacyjujucca z hodam kanfliktu, a litary — z nazvaj vyspaŭ).
U vyniku napadu paciarpieŭ aŭtamabil viadučaha i adzin z techničnych śpiecyjalistaŭ z Arhienciny, naniatych brytanskaj kamandaj, — kamień trapiŭ jamu ŭ tvar. Incydent vyklikaŭ mocnaje hramadskaje abureńnie, tamu arhiencinskim uładam pryjšłosia paprasić kamandu Top Gear źjechać raniej za zapłanavany termin.
Telekanał BBC, što tranśluje šoŭ, sa svajho boku, admaŭlaje naŭmysnaje vykarystańnie zhadanaha numara z metaj nahadvańnia pra vajnu i śćviardžaje, što takaja asacyjacyja — usiaho tolki supadzieńnie.
Falklendskaja vajna 1982 — kanflikt, jaki adbyŭsia pamiž Vialikabrytanijaj i Arhiencinaj z-za terytaryjalnych sprečak za Falklendskija vyspy (u Arhiencinie ich nazyvajuć Malvinskija), na jakija pretendavali abiedźvie krainy. Vajna skončyłasia pieramohaj Vialikabrytanii, jakaja praciahvaje kantralavać vyspy.
Kamientary