Razhlad kryminalnaj spravy ŭ dačynieńni da dźviuch byłych słužbovych asob AAT «Antasam», jakija abvinavačvajucca ŭ kradziažy hrašovych srodkaŭ udzielnikaŭ dolevaha budaŭnictva žyłoha kompleksu «Samaćviety» pačniecca ŭ sudzie Frunzienskaha rajona Minska 18 vieraśnia.
Pra heta paviedamili ŭ Viarchoŭnym sudzie Biełarusi.
Dziejańni abvinavačvanych kvalifikavany na padstavie č. 4 art. 209 KK (machlarstva, učynienaje ŭ asabliva bujnym pamiery), č. 1 art. 427 KK (słužbovaja padrobka), č. 4 art. 210 KK (kradziež šlacham złoŭžyvańnia słužbovymi paŭnamoctvami, učynieny ŭ asabliva bujnym pamiery), č. 2, 3 art. 424 KK (złoŭžyvańnie słužbovymi paŭnamoctvami, jakoje mieła vynikam pryčynieńnie značnaha ŭronu pravam i intaresam hramadzian i ciažkija nastupstvy ŭ vyhladzie pryčynieńnia ŭronu ŭ asabliva bujnym pamiery), č. 2 art. 216 KK (pryčynieńnie majomasnaj škody biez prykmiet kradziažu).
Nahadajem, ustanoŭlena, što pryčynienaja dziejańniami słužbovych asob materyjalnaja škoda skłała prykładna 6 miljardaŭ rubloŭ. Padčas śledstva zabiaśpiečana jaje pakryćcio ŭ poŭnym abjomie. Nakładzieny aryšt na majomaść abvinavačvanych bolš jak na 3,5 miljarda rubloŭ.
Z ulikam ustanoŭlenych śledstvam faktyčnych akaličnaściaŭ spravy kampietentnymi orhanami byli ŭniesieny istotnyja źmianieńni ŭ prajektna-kaštarysnuju dakumientacyju, uparadkavana raźmierkavańnie hrašovych srodkaŭ, ažyćcioŭleny šerah inšych mierapryjemstvaŭ, jakija dazvolili zaviaršyć budaŭnictva žyłoj častki i ŭvieści jaje ŭ ekspłuatacyju ŭ kancy červienia hetaha hoda.
Kryminalnaja sprava ŭ dačynieńni da zasnavalnikaŭ i słužbovych asob budaŭničaj kampanii «Antasam» pa prykmietach złačynstva, praduhledžanaha č. 4 art. 210 KK (kradziež šlacham złoŭžyvańnia słužbovymi paŭnamoctvami) była raspačata KDB Biełarusi hod tamu.
Tady paviedamlałasia, što z maja 2009 hoda pa žnivień 2013 hoda dyrektar kampanii ŭ zmovie ź jaje zasnavalnikami šlacham złoŭžyvańnia słužbovymi paŭnamoctvami zavałodali hrašovymi srodkami ŭdzielnikaŭ dolevaha budaŭnictva, pieraličanymi ŭ adras «Antasama» na budaŭnictva kvater u žyłym kompleksie «Samaćviety» ŭ Frunzienskim rajonie Minska, što mieła vynikam pryčynieńnie ŭronu ŭ asabliva bujnym pamiery.
Doma va ŭkazanych asob i ŭ ofisach padkantrolnych im kamiercyjnych struktur supracoŭnikami KDB było vyjaŭlena i kanfiskavana kala 18 kh zołata ŭ źlitkach Nacyjanalnaha banka Biełarusi. U padazronych ustanoŭlena najaŭnaść darahich abjektaŭ nieruchomaści i transpartnych srodkaŭ.
Ciapier čytajuć
U archivach SBU znajšlisia dakumienty, jak savieckija śpiecsłužby zavierbavali emisara AUN, ale ŭkrainskaje padpolle heta vykryła i zabiła zdradnika33
Kamientary