Kiraŭnik likvidavanaha ŭładami biełaruskaha pravaabarončaha centra «Viasna» Aleś Bialacki 22 lipienia ŭ Minsku prezientavaŭ svaju novuju knihu — ese «Irtutnaje srebra žyćcia. Prałoh. Natatki pravaabaroncy».
U knihu ŭvajšli ese, natatki i ŭspaminy Bialackaha, napisanyja ŭ 2012—2013 hadach, kali pravaabaronca adbyvaŭ pakarańnie ŭ kałonii ŭ Babrujsku (Mahiloŭskaja vobłaść). Kniha raździelena na try častki: ese, listy-ŭspaminy ab sustrečach z zamiežnymi kalehami, a taksama tekst vystupleńnia Bialackaha z apošnim słovam na sudzie 23 listapada 2011 hoda. Vydańnie vyjšła ŭ Vilniusie nakładam 1 tys. asobnikaŭ.
Układalnik knihi pravaabaronca Alena Łapcionak na prezientacyi zaznačyła, što faktyčna makiet knihi byŭ hatovy da kanca 2013 hoda, adnak «z-za peŭnych ciažkaściaŭ» ź jaje vydańniem vyjšła zaminka». Prezientacyju zbornika ese płanavali arhanizavać u červieni hetaha hoda, ale ŭ spravu ŭmiašalisia akaličnaści — 21 červienia na volu vyjšaŭ aŭtar.
Svaje ese Bialacki prysyłaŭ Łapcionak u vyhladzie doŭhich listoŭ, jakija ŭ zatym nabiralisia ŭ drukavanym vyhladzie i adpraŭlalisia nazad pravaabaroncu — na redahavańnie.
«Ese pisalisia ŭ babrujskaj kałonii na praciahu paŭhoda, — skazała Łapcionak. — U ich Aleś raskazvaje pra padziei, jakija papiaredničali jaho aryštu ŭ 2011 hodzie. Heta było niešta nakštałt padviadzieńnia vynikach peŭnaha etapu jaho žyćcia. Ilustracyjami da knihi stali fatahrafii, jakija my źbirali, kali stvarali vystavu da 15-hodździa pravaabarončaha centra «Viasna».
Bialacki ŭ svaju čarhu zaznačyŭ, što kniha «pačała stvaracca dastatkova stychijna». «Iryna (druhi ŭkładalnik knihi pravaabaronca Iryna Prakopčyk) paprasiła napisać pra tyja pajezdki ŭ Kirhiziju i Kazachstan, jakija byli ŭ kancy 2010 hoda jakraz pierad samymi vybarami. Pačaŭšy z hetych natatak ab tym, što ja bačyŭ padčas mižnacyjanalnych sutyknieńniaŭ u Kyrhyzstanie, ja zrazumieŭ, što raskazvać nasamreč treba ź vieraśnia 2010 hoda, kali biełaruskija pravaabarončyja arhanizacyi praviali ź`iezd u Vilni», — skazaŭ jon.
Ciapier čytajuć
Anžalicy Mielnikavaj vydali pašpart prykryćcia na imia Anhieliny Radzivonavaj?5
Kamientary