Pralaskoŭski abiacaje źniać zabaronu z NRM, «Kramy» i «Neuro Dubel»-ju

Kiraŭnik idealahičnaha ŭpraŭleńnia Administracyi prezydenta Aleh Pralaskoŭski zaihryvaje ź liderami N.R.M., Neuro Dubel, «Pałacu» i «Kramy». Muzyki schilnyja zapluščyć vočy.

U Administracyi prezydenta Biełarusi adbyłasia sustreča biełaruskich rok‑muzykaŭ z čynoŭnikami. Kiraŭnik idealahičnaha ŭpraŭleńnia Administracyi prezydenta Aleh Pralaskoŭski ŭ razmovie ź liderami hurtoŭ N.R.M., Neuro Dubel, «Pałac» i «Krama» pryznaŭ najaŭnaść raniejšych zabaronaŭ na tvorčaść hetych hurtoŭ i prapanavaŭ žyć pa‑siabroŭsku.

«Vazelinu nam nie prapanoŭvali», — paviedamiŭ paśla sustrečy lider Neuro Dubel Alaksandar Kullinkovič.

Aleh Pralaskoŭski padaŭsia muzykantu «čałaviekam abajalnym i adekvatnym». Kullinkovič adznačyŭ, što tema razmovy faktyčna supała z tym, što jon pisaŭ u artykule dla Tuzina Hitoŭ.

Sa słovaŭ Kullinkoviča, usie ŭdzielniki sustrečy pahadzilisia, što muzykantam nia varta śpiavać pad lubymi ściahami — bieł‑čyrvona‑biełymi ci čyrvona‑zialonymi — niavažna.

Pry hetym była adkinuta prapanova Pralaskoŭskaha — zrabić maštabny kancert pad nazvaj «Rok za Biełaruś».

«Prydumajcie nazvu, jakuju sami chočacie», — prapanavaŭ u adkaz ideołah.

Na dumku Ihara Varaškieviča, «razmova viałasia dosyć kanstruktyŭna i my sapraŭdy parazumielisia». «My vykłali svaju pazicyju i nas nie prasili pakajacca, ci niešta jašče. Naadvarot — abiacali nie pieraškadžać», — padkreśliŭ jon.

Pavodle muzykaŭ, Pralaskoŭski paabiacaŭ spryjać u dalejšaj kancertnaj dziejnaści hurtoŭ N.R.M., Neuro Dubel, «Pałac» i «Krama».

Što da apošniaj zabarony kancertu hurtu Neuro Dubel, to Aleh Pralaskoŭski nazvaŭ heta «pierahibam na miescach».

Buh; pavodle Radyjo Racyja

***

PAD JAKIMI ŚCIAHAMI ZAJHRAJUĆ ROK‑MUZYKI

Na siońniašniaj sustrečy ź liderami hurtoŭ N.R.M., Neuro Dubel, «Pałac» i «Krama» kiraŭnik ideałahičnaha ŭpraŭleńnia Administracyi prezidenta Aleh Pralaskoŭski paprasiŭ muzykaŭ bolš nie vystupać na akcyjach apazicyi. Tyja z hetym pahadzilisia.

Ale ci heta značyć, što muzyki sami ciapier buduć prasić słuchačoŭ zhortvać ściahi na kancertach? Lider N.R.M. Lavon Volski skazaŭ Racyi, što jon asabista da hetaha zaklikać nie budzie.

‑ Kali‑niebudź pad hetymi ściahami my budziem nie tolki vystupać, ale i žyć.

Adnak prapanova Aleha Pralaskoŭskaha nakont bujnoha kancerta pad nazvaj «Rok za Biełaruś» była adkinutaja. «Prydumajcie nazvu, jakuju sami chočacie», — skazaŭ tady jon i paabiacaŭ teleefir biełaruskamu roku. Lider «Pałacu» Aleh Chamienka adrazu ž prapanavaŭ nazvać taki fest «Rok dla Biełarusi».

Radyjo Racyja

KAMENTAR

Najpierš heta pryznańnie: biełaruski rok nie złamać. Ale kali nie złamać, možna pasprabavać kupić. Lohika adpaviednaja marali. U kožnym razie, siońnia heta vialikaja pieramoha Muzyki i Movy. Niachaj hučać, a čas usio rasstavić na miescy.

Barys Tumar

• 0
• 0
• 0
• 0
• 0
• 0
• 0
• 0