Łukašenka — čynoŭnikam: Pamiatajecie, jak častka nasielnictva aburałasia, što źbirajem transpartny zbor?

Alaksandr Łukašenka daručyŭ adnavić 1 sakavika budaŭnictva druhoj kalcavoj aŭtamabilnaj darohi vakoł Minska. Pra heta jon zajaviŭ, zasłuchaŭšy 28 lutaha dakłady čynoŭnikaŭ ab budaŭnictvie druhoj kalcavoj.

Jak raniej paviedamlałasia, 11 lutaha namieśnik načalnika hałoŭnaha ŭpraŭleńnia aŭtamabilnych daroh Ministerstva transpartu i kamunikacyj Alaksandr Hałaŭnioŭ paviedamiŭ, što «zaraz padrychtavany prajekt ukaza prezidenta ab prypynieńni budaŭnictva druhoj MKAD z-za adsutnaści finansavych srodkaŭ».

Łukašenka nahadaŭ, što ŭ svoj čas, prymajučy rašeńnie pra budaŭnictva «druhoha kalca» vakoł Minska, pryjšli da vysnovy maksimalna vykarystoŭvać dla jaho stvareńnia isnujučyja aŭtamabilnyja darohi, da prykładu trasu na Maskvu, vyznačylisia, jak mienavita projdzie hetaja daroha. «My damovilisia ab tym, što jana vielmi patrebnaja, tamu što Minsk užo siońnia pieranasyčany transpartam. Ja nie chaču skazać, što hety transpart budzie ŭ hieamietryčnaj prahresii ŭzrastać, jak heta było niekali, nie.

Mnie zdajecca, užo ŭsie, chto chacieŭ u svoj čas, kali my rychtavalisia ŭvodzić pošlinu na aŭtamabili, zakupili na budučyniu hetyja aŭtamabili i zavieźli, chto bahaciejšy — novyja. Tamu takoha ŭsplosku pavieličeńnia kolkaści aŭtatranspartu nie budzie», — miarkuje Łukašenka.

Razam z tym jon źviarnuŭ uvahu, što tendencyja da rostu aŭtatranspartu nazirajecca va ŭsim śviecie, i Biełaruś tut nie źjaŭlajecca vyklučeńniem. «Bolš za toje, uvieś čas uzrastaje tranzit cieraź Biełaruś. I jon idzie ŭ napramku Zachad — Uschod, — zaznačyŭ biełaruski kiraŭnik. — Usio havoryć pra toje, što jakraz hety patok budzie raści ŭ hieamietryčnaj prahresii i jon budzie iści cieraź Minsk».

Łukašenka zaŭvažyŭ, što isnujučaja kalcavaja aŭtadaroha vakoł biełaruskaj stalicy siońnia ŭžo pierahružanaja, u tym liku i ŭ suviazi z rostam tranzitnaha patoku. Da taho ž, na jaho dumku, stvareńnie «druhoha kalca» stanoŭča adabjecca na ekałahičnaj situacyi ŭ horadzie. «My nieadkładna pavinny pačać raboty pa budaŭnictvie druhoj kalcavoj darohi vakoł Minska dla taho,

kab Minsk nie zadychnuŭsia ŭ hetym brudzie, kab 2 młn. čałaviek, čverć nasielnictva našaj krainy, nie adčuvali hetuju prablemu. Treba mieć na ŭvazie, što ad hetaha i ŭsie chvaroby. I nam daviadziecca płacić šalonyja hrošy dla taho, kab lačyć ludziej. Hetaha taksama nie treba zabyvać, — skazaŭ jon. — Hałoŭnaje toje, što my atrucim minčan, kali ŭ bližejšyja hady nie pabudujem hetuju darohu».

Jak paviedamiŭ premjer-ministr Michaił Miaśnikovič, uvohule praciahłaść darohi składaje 85 km, ź jakich na pieršym etapie płanujecca pabudavać 44 km — učastak ad Astrašyckaha Haradka da Aksakaŭščyny. Pavodle słoŭ premjer-ministra, za vyklučeńniem finansavaha boku pytańnia inšych pryčyn, kab nie budavać aŭtadarohu, niama.

Łukašenka ŭ suviazi z hetym zaznačyŭ, što z ulikam užo isnujučych učastkaŭ darohi budaŭnictva budzie nie takim finansava zatratnym. «A kali ŭziać usie pytańni pad kantrol i ekanomić hrošy, to my jaje možam pabudavać, — miarkuje jon. — Ciažka budzie zaŭsiody, hrošaj zaŭsiody nie chapaje, i pry hetym ja prašu ŭličyć:

vy pamiatajecie, jak aburałasia peŭnaja častka nasielnictva ŭ suviazi z tym, što my źbirajem transpartny zbor.

Majcie na ŭvazie — usie hetyja hrošy pavinny pajści na darohi. Ni na jakija inšyja patreby — tolki na darohi! U advarotnym vypadku krytyka naroda budzie abhruntavanaj. Za heta ŭrad adkaža. Usie hrošy, sabranyja ad hetaha transpartnaha padatku, pavinny być układzienyja ŭ darohi».

Miaśnikovič zaznačyŭ, što, vykonvajučy daručeńnie kiraŭnika dziaržavy, srodki kancentravalisia na toje, kab zrabić maksimalna dobruju i kamfortnuju suviaź z abłasnymi centrami i inšymi bujnymi haradami. Tak, pavodle jaho słoŭ, za try hady było pabudavana 344 km daroh respublikanskaha značeńnia vydatnaj jakaści, pry hetym za ŭsiu minułuju piacihodku — 328 km. Sioleta płanujecca ŭvieści jašče 104 km daroh.

Łukašenka padkreśliŭ, što nieabchodna pryvieści ŭ naležny stan i trasy ad Minska ŭ napramku Hrodna i Viciebska, pa prykładzie taho, jak heta było zroblena ź inšymi abłasnymi centrami, a taksama biełaruski ŭčastak darohi Adesa — Sankt-Pieciarburh.

Miaśnikovič zaznačyŭ, što druhaja MKAD «prajektujecca pa pieršaj katehoryi», što maje na ŭvazie intensiŭnaść ruchu ad 10 tys. i bolš aŭtamabilaŭ štodzień. Da prykładu, isnujučaja kalcavaja aŭtadaroha siońnia prapuskaje kala 90 tys. aŭtamabilaŭ, heta značyć nahruzka na jaje ŭ 9 razoŭ pieravyšaje minimalnuju adznaku dla pieršaj katehoryi daroh. Pavodle słoŭ ministra transpartu i kamunikacyj Anatola Sivaka, raboty pa stvareńni «druhoha kalca» dahetul vialisia niedastatkovymi tempami.

U vyniku vyrašana pačać budaŭnictva kalcavoj na tych učastkach, dzie ŭžo byli pačatyja padrychtoŭčyja raboty, a ŭ 2014 hodzie ŭvieści jaje pieršyja 20 kiłamietraŭ.

Padčas dakłada vyznačana stratehija budaŭnictva aŭtadarohi na hety i nastupnyja hady, a taksama ŭčastki, dzie raboty buduć vieścisia intensiŭna. Aprača taho, išła razmova ab krynicach finansavańnia, pryciahnieńni ŭ tym liku častkova srodkaŭ z darožnaha zboru.

Nahadajem, raboty pa budaŭnictvie darohi byli raspačatyja ŭ 2011 hodzie ŭ adpaviednaści z daručeńniem kiraŭnika dziaržavy, adnak u 2012 hodzie prajekt byŭ faktyčna zamarožany z-za adsutnaści finansavańnia.

• 0
• 0
• 0
• 0
• 0
• 0
• 0
• 0