Muziei Janki Kupały i Jakuba Kołasa taksama stanuć filijałami
Naprykancy minułaha hoda Ministerstva kultury pryniała rašeńnie źnizić status Litaraturnaha muzieja Maksima Bahdanoviča i rearhanizavać jaho ŭ filijał Dziaržaŭnaha muzieja historyi biełaruskaj litaratury.
Tyja ž źmieny čakajuć Litaraturny muziej Pietrusia Broŭki. Taksama płanavałasia, što Dziaržaŭny muziej historyi teatralnaj i muzyčnaj kultury stanie častkaj Nacyjanalnaha histaryčnaha.
Ale hetym aptymizacyja muziejnaj śfiery nie abmiežavałasia.
Litaraturaznaŭca Cichan Čarniakievič napisaŭ na svajoj staroncy ŭ Fejsbuku, što muziei Janki Kupały i Jakuba Kołasa pavinny da žniŭnia 2014 hoda pieratvarycca ŭ filijały Muzieja historyi biełaruskaj litaratury. Apošni budzie reahranizavany ŭ Nacyjanalny muziej historyi biełaruskaj litaratury.
Jak paviedamiŭ Čarniakieviču ananimny infarmatar, takija źviestki ŭtrymlivajucca ŭ novym płanie pa aptymizacyi ŭstanoŭ kultury, jaki raspracavany ministerstvam.
U Ministerstvie kultury «Našaj Nivie» častkova paćvierdzili infarmacyju. Namieśnik načalnika ŭpraŭleńnia ŭstanoŭ kultury i narodnaj tvorčaści Dźmitryj Šlachcin zajaviŭ, što
ideja ab stvareńni Nacyjanalnaha muzieja historyi biełaruskaj litaratury naležyć samomu ministerstvu. Choć rašeńnie jašče kančatkova nie pryniataje.
Dźmitryj Šlachcin tłumačyć inicyjatyvu tym, što
status nacyjanalnaha muzieja dazvolić uźniać status filijałaŭ. I što jašče bolš istotna, pavialičyć zarobki supracoŭnikaŭ.
Bo taki status praduhledžvaje inšy kaeficyjent dla naličeńnia zarobku.
Na pytańni pra mahčymyja skaračeńni supracoŭnik Minkulta patłumačyŭ, što
asnoŭnyja skaračeńni prajšli ŭ 2013 hodzie. Pry novaj rearhanizacyi jany mohuć zakranuć tolki administracyjny aparat i nie buduć tyčycca navukovych supracoŭnikaŭ.
Pry rearhanizacyi muzieja Bahdanoviča hramadskaść vykazvała naściarohu, što ŭ filijała mohuć uźniknuć składanaści pry praviadzieńni navukovych daśledavańniaŭ, a taksama moža raskvitnieć biurakratyzm. Jak padkreśliŭ Dźmitryj Šlachcin,
pavodle ŭsich narmatyŭnych aktaŭ, filijał źjaŭlajecca adasoblenym strukturnym padraździaleńniem. Płanujecca, što kiraŭniki filijałaŭ atrymajuć davieranaść, jakaja dazvolić im samastojna vyrašać biahučyja pytańni i zajmacca kamplektacyjaj muziejnych fondaŭ.
Kamientary