Ihar Mahazińnik: biełarus, jaki stvaryŭ prahramu Viber i pradaŭ jaje japoncam za $900 miljonaŭ

Japonskaja kampanija Rakuten nabyła biełaruska-izrailski siervis Viber za hihanckija $900 miljonaŭ.

Što takoje «Vajbier»?

Prahrama Viber («Vajbier») dazvalaje svaim karystalnikam vieści hutarki i abmieńvacca paviedamleńniami, vykarystoŭvajučy Wi-Fi i 3G-internet. Płacić davodzicca tolki za spažyty internet-trafik, a nie za darahija mižnarodnyja zvanki.

«Vajbier» šmat u čym padobny na lehiendarny «Skajp», choć stvaralniki imknucca paźbiehnuć paralelaŭ z bolš papularnym kankurentam.

Adnak jość i niekalki pryncypovych adroźnieńniaŭ. Naprykład, jak adznačaŭ Ihar Mahazińnik, jahonaja prahrama ad pačatku była stvoranaja pad mabilnyja pryłady, u toj čas jak «Skajp» pačynaŭ svajo pieramožnaje šeście z kampjutaraŭ. Tamu «Vajbier» navučany aščadžać batareju smarftona.

Aproč taho, dla zvanka praz «Skajp» treba papiarednie trapić u śpisie kantaktaŭ svajho miarkujemaha surazmoŭcy. A «Vajbieru» dastatkova viedać mabilny numar abanienta.

Prahrama karystajecca papularnaściu ŭ Azii, imkliva zavajovaje kitajski rynak. Kolkaść karystalnikaŭ pieravyšaje 300 miljonaŭ čałaviek.

Što ŭ im biełaruskaha?

Kampanija Viber Media zarehistravanaja na afšornym Kipry, adnak maje ofisy ŭ Biełarusi i Izraili.

Stvaralniki prajektu Ihar Mahazińnik i Talman Marka paznajomilisia ŭ izrailskaj armii. Jany zapuścili siervis u kancy 2010 hoda, ad taho času jon biaspłatny dla karystalnikaŭ. Abjom inviestycyj u «Vajbier» skłaŭ jak minimum $20 miljonaŭ, adnak dola kožnaha z zasnavalnikaŭ nieviadomaja.

Na terytoryi Biełarusi, u Minsku i Breście, pracujuć z paŭsotni prahramistaŭ, jakija stvarajuć klijenckija prahramy dla roznych płatfomaŭ – smartfonaŭ z apieracyjnymi sistemami Android, iOS i inšymi. Niadaŭna źjaviłasia i viersija dla stacyjanarnych kampjutaraŭ na bazie Windows.

Aproč taho, kampanija zarehistravanaja jak rezident biełaruskaha Parka vysokich technałohij. Heta daje «Vajbieru» vielizarnyja padatkovyja lhoty.

Sam Ihar Mahazińnik vyras u Biełarusi, adnak ciapier žyvie na niekalki krain, maje i biełaruskaje, i izrailskaje hramadzianstva.

Nakolki «Vajbier» biaśpiečny?

Pry karystańni prahramaj niepatrebna rehistravacca, tamu ničoha, aproč telefonnaha numaru, «Vajbier» nie viedaje. Ale kali abanient znachodzicca pa-za siecivam, paviedamleńni, dasłanyja praz prahramu, zachoŭvajucca na siervierach. A voś pieramovy praz «Skajp» ni na adnym sierviery nie zachoŭvajucca.

Pry atrymańni zapytu ad pravaachoŭčych orhanaŭ, «Vajbier» abaviazany vydavać infarmacyju, jakoj vałodaje. Choć kiraŭnictva kampanii śćviardžaje, što karyści ad hetych minimalnych źviestak atrymać składana.

I ŭ jakaści arhumienta na karyść svajoj biaśpieki pryvodzić situacyja, jakaja ŭtvaryłasia ŭ Saŭdaŭskaj Aravii. Tamtejšyja śpiecsłužby zapatravabali pradastavić im dostup da razmovaŭ abanientaŭ «Vajbiera». Kampanija admoviłasia i syšła ź miascovaha rynku. A voś «Skajp» niejkim čynam praciahvaje pracu ŭ krainie.

• 0
• 0
• 0
• 1
• 0
• 0
• 0
• 0