Radykalnaje kryło Jeŭramajdanu «Pravy siektar» — chto jany FOTY
Hramadski ruch «Pravy siektar» — radykalnaje kryło Jeŭramajdanu, što abjadnoŭvaje ŭkrainskich nacyjanalistaŭ. Staŭleńnie da jaho nieadnaznačnaje jak va Ukrainie, tak i za jaje miežami. Adny zachaplajucca ich rašučaściu, inšyja asudžajuć radykalnaść. Ale vidavočna: Ukrainskaja revalucyja nie była b takoj biez padtrymki «Pravaha siektaru».
Upieršyniu «Pravy siektar» prajaviŭ siabie ŭ noč na 30 listapada 2013 h. Padčas razhonu Jeŭramajdanu nacyjanalisty namahalisia adbivać ataki «Bierkuta» na studentaŭ. Z taje pary «Pravy siektar» staŭ vialikaju siłaju, hałoŭnaja meta jakoj — achova dy abarona pratestoŭcaŭ.
Asnoŭnyja dziejańni adbyvajucca ŭ Kijevie. Łahična, što hałoŭny štab i pieravažnaja bolšaść nacyjanalistaŭ znachodzicca tam. Adnak u inšych haradach utvoranyja padraździeły, jakija zajmajucca dapamohaj miascovym sotniam samaabarony dy zboram ciopłaj adziežy, achoŭnaj ekipiroŭki, hihijeničnych prynaležnaściaŭ i h.d.
«Naša Niva» zavitała da Lvoŭskaha padraździeła «Pravaha siektaru» i pahladzieła na arhanizacyju jaho pracy.
Namiot «Pravaha siektaru» staić na Lvoŭskim Jeŭramajdanie (kala pomnika Tarasu Šaŭčenku). Tut prymajuć rečy, jakija prynosiać dObraachvotniki na padtrymku nacyjanalistaŭ u Kijevie. Praces davoli aktyŭny: pry mnie za paŭhadziny zapoŭnili dy adpravili dźvie mašyny.
Ad namiotu mašyny nakiroŭvajucca da štaba lvoŭskaha padraździeła, jaki znachodzicca ŭ Abłdziaržadministracyi. Tudy ludzi taksama prynosiać nieabchodnaje na patreby «Pravaha siektaru». Zahružany transpart jedzie ŭ Kijeŭ.
U ścienach Lvoŭskaj ADA znachodziacca pakoj dla adpačynku, kuchnia i miedpunkt «Pravaha siektaru». La ŭvachodu staić achova.
Tam ža raźmiaściłasia i kiraŭnictva. Andrej (na nižnim fota biez maski), staršynia lvoŭskaha padraździeła «Pravaha siektaru» tak kaža pra svaje zadačy: «Hałoŭnaje zaraz – padtrymka Kijeva, tamu tut my robim usio mahčymaje, kab našy siabry tam atrymoŭvali nieabchodnyja rečy svoječasova. Taksama my razam z sotniaju samaabarony zajmajemsia achovaj aktyvistaŭ Lvoŭskaha Jeŭramajdanu».
«My patrabujem praviadzieńnia kanstytucyjnaj reformy, viartańnia da Kanstytucyi takoha ŭzoru, jaki źjaŭlajecca najbolš prymalnym dla ŭkraincaŭ,
– raspaviadaje pra pazicyi «Pravaha siektaru» Andrej, – a taksama prypynieńnie siłavych dziejańniaŭ, poŭnuju amnistyju dy vyzvaleńnie palitviaźniaŭ».
Ciapier čytajuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam6
Kamientary