Kličko: Zadača vykananaja — «Ukrainski dom» uziaty biez krovapralićcia
U noč na 26 studzienia mitynhoŭcy ŭ Kijevie akružyli, a zatym i zaniali «Ukrainski dom» na Jeŭrapiejskaj płoščy, u jakim napiaredadni dniom zabarykadavalisia bajcy «Bierkuta» i vajskoŭcy ŭnutranych vojskaŭ.
Pa słovach adnaho z aktyvistaŭ, ataka pačałasia spantanna.
Dniom 25 studzienia, atrymaŭšy infarmacyju pra toje, što niekalki socien siłavikoŭ prybyli i začynilisia va «Ŭkrainskim domie» (pabudavany ŭ savieckija časy jak Muziej Lenina), mitynhoŭcy pabudavali barykadu nasuprać. A ŭviečary paśla vystupu na Majdanie lideraŭ apazicyi, aktyvisty samaabarony zapatrabavali ad siłavikoŭ pakinuć Ukrainski dom. Ale atrymali admovu. Pačali šturm.
U raźbityja vokny palacieli šyny, piratechnika, miaški sa śnieham. Z dapamohaj trosa atakujučyja adčynili dźviery «Ukrainskaha doma».
Pad kryki «Kijeŭ ustavaj», «Bandu heć!» mitynhoŭcy stali kidać u raźbityja vokny «kaktejli Mołatava».
Pa niepaćvierdžanaj infarmacyi va Ŭkrainskim domie znachodzilisia kala 200 pravaachoŭnikaŭ.
Zastajučysia ŭnutry budynka, jany vykarystoŭvali ślezaciečny haz i palivali mitynhoŭcaŭ vadoj z brandspojtaŭ.
Mitynhoŭcy ŭtvaryli ŭ natoŭpie niekalki kalidoraŭ, kab zabiaśpiečyć vychad siłavikoŭ z budynka. Adnak siłaviki zastavali ŭ budynku, zakryŭšysia ščytami.
«Adkaznaść za eskałacyju kanfliktu, pry adsutnaści rašeńnia lažyć całkam na kiraŭnictvie pravaachoŭnikaŭ», — napisaŭ u FB deputat ad partyi «Baťkivŝina» Arsien Avakaŭ, jaki razam z kamiendantam Jeŭramajdana Andrejem Parubijem vioŭ pieramovy ź siłavikami.
Tyja adkazali, što čakajuć zahadu svajho kiraŭnictva.
Kala 5:00 (06:00 pa Minsku) ministr unutranych spraŭ Vital Zacharčanka pryniaŭ rašeńnie vyvieści hrupu reziervu pravaachoŭnikaŭ, jakija, pa jaho słovach, adpačyvali va «Ŭkrainskim domie».
Adznačajecca, što rašeńnie było pryniata z metaj nie pieraškadžać pieramoŭnamu pracesu i ŭrehulavać situacyju mirnym šlacham.
U MUS, adnak, śćviardžajuć, što «metaj mitynhoŭcaŭ było ŭziaćcie ŭ pałon pravaachoŭnikaŭ dla dalejšaha abmienu na aktyvistaŭ Majdana, jakija znachodziacca za kratami».
Niepasredny ŭdzieł u tym, kab pierakanać pravaachoŭnikaŭ pakinuć budynak «Ukrainskaha doma», pryniaŭ Vital Kličko, paviedamlaje interfax.com.ua. Jon prybyŭ da budynka kala 3:30 (4:30 pa Minsku).
«Zadańnie vykanana. Uziaćcie Ukrainskaha doma abyšłosia biez krovapralićcia», — zajaviŭ Vital Kličko nočču na miescy padziej.
Jon daručyŭ arhanizavać achovu na ŭvachodach i vychadach budynka. Na pytańnie, u jakich metach płanujecca vykarystoŭvać budynak Ukrainskaha doma, apazicyjny lider nie zmoh pakul adkazać.
Kamientary