Kiravać Maładym frontam buduć Daškievič, Cianiuta i Łobaŭ
U Minsku prajšoŭ VII źjezd zarehistravanaj u Čechii moładzievaj patryjatyčnaj arhanizacyi «Małady front».
U jakaści delehataŭ zarehistravałasia 55 čałaviek, ale nasamreč u zale našmat bolš ludziej. Miesca chapiła nie ŭsim.
Intryha napačatku była ŭ tym, chto stanie novym staršyniem arhanizacyi: vykazvałasia dumka, što spabornictva budzie pamiž «libierałam» Ivanam Šyłam i «kansiervataram» Andrusiem Cianiutam. Raniej Źmicier Daškievič kazaŭ, što pakidaje pasadu staršyni MF, jakuju zajmaŭ ad 2008 h.
Delehaty źjezda zapatrabavali vyzvaleńnia i reabilitacyi ŭsich palitviaźniaŭ (da Aŭtuchoviča, Bialackaha, Statkieviča, Łobava, Vaśkoviča, Alinieviča, Hajdukova, Dziadka i Prakapienki, MFaŭcy dadajuć ksiandza U. Łazara i Vasila Parfiankova) zaklikali demakratyčnyja krainy da ekanamičnych sankcyj suprać Łukašenki.
Taksama ŭdzielniki źjezda miarkujuć, što Biełaruś nie varta zaprašać na samit «Uschodniaha partniorstva» ŭ Vilniu.
Što datyčyć ideałohii, delehaty paćvierdzili, što dziejnaść MF niesumiaščalnaja z prapahandaj lubych idej, jakija supiarečać chryścijanskim kaštoŭnaściam — ci tatalitarnych ideałohij (kamunizmu, nacyzmu), ci maralnaj razbeščanaści (pjanstva, narkamanii, piedafilii, homaseksualizmu). Luby siabra, jaki prapahanduje hetyja idei, aŭtamatyčna hublaje siabroŭstva ŭ arhanizacyi, zajavili siabry arhanizacyi.
Haračyja dyskusii vyklikała taksama abmierkavańnie maderacyi supołki MF u sacyjalnaj sietcy «UKantakcie».
Urešcie prahałasavali za źmieny. Adminam supołki budzie Źmicier Daškievič, za jaho kandydaturu prahałasavali 29 čałaviek suprać 9 (13 čałaviek ustrymalisia).
Prapanavana ŭvieści pasady čatyroch sustaršyniaŭ, u tym liku sa sustaršynioj palitviaźniem Eduardam Łobavym, zatrymanym pierad prezidenckimi vybarami 18 śniežnia 2010 hoda i asudžanym na čatyry hady źniavoleńnia.
Prapanovu zrabiŭ Źmicier Daškievič, ideja była ŭchvalena.
Na pasady inšych sustaršyniaŭ byli prapanavanyja kandydatury: Nasty Daškievič, Mikoły Dziemidzienki, Andrusia Cianiuty i Ivana Šyły. Daškievič, Dziemidzienka i Šyła ŭziali samaadvod.
Pačaŭsia lohki bałahan. Kirkievič, Vasiljeŭ i Jaromienak taksama ŭziali samaadvody.
Urešcie paśla 18-j hadziny pačynajecca hałasavańnie pa sustaršyniach: u biuleteniach try kandydatury -- Źmicier Daškievič, Andrej Cianiuta i samavyłučeniec sa Śvietłahorska Vadzim Bieły.
Kambinacyja moža być lubaja: možna ŭsich troch vykraślić, možna ŭsich pakinuć, adnaho ci dvuch. A pieramoža toj, chto nabiare 50% + 1 hołas.
Takim čynam sustaršyniami abranyja Daškievič, Cianiuta, Łobaŭ. Čaćviorty sustaršynia budzie abrany na dadatkovaj siesii.
U arhkamitet abranyja Ivan Šyła, Mikoła Dziemidzienka, Nasta Daškievič, Jaŭhien Skrabiec, Uładź Jaromienak, Raman Vasiljeŭ, Jula Vinachodava, Vadzim Bieły, Stanisłaŭ Račkiel (Hrodna), Dźmitryj Kramianiecki.
* * *
«Małady front» byŭ zasnavany ŭ 1997 h. jak moładzievaje kryło patryjatyčnaha ruchu BNF. Praź jaho prajšli niekalki sotniaŭ maładych ludziej.
Da 2004 h. jaho ŭznačalvaŭ Pavieł Sieviaryniec, zatym u 2005—2008 hh. sustaršyniami byli Siaržuk Bachun i Źmicier Daškievič. Ad 2008 h. kiraŭnikom byŭ Źmicier Daškievič.
Sioleta Daškievič zajaviŭ, što nie budzie bałatavacca na staršyniu.
Arhanizacyja zarehistravanaja ŭ Čechii, bo sproby zrabić heta ŭ Biełarusi akazalisia marnymi.
Kamientary