Kala kaściołaŭ pačynajecca zbor podpisaŭ za vyzvaleńnie ksiandza Uładzisłava Łazara

Arhkamitet pa stvareńni partyi «Biełaruskaja chryścijanskaja demakratyja» (BCHD) abjaviŭ pra pačatak kampanii pa zbory podpisaŭ za vyzvaleńnie ksiandza Uładzisłava Łazara.

Jak paviedamiŭ BiełaPAN adkazny sakratar arhanizacyi Dzianis Sadoŭski, kampanija startuje 14 žniŭnia. Zbor podpisaŭ budzie pravodzicca kala kaściołaŭ u roznych miescach krainy da taho času, pakul śviatara nie vyzvalać.

Nahadajem, 13 žniŭnia aktyvisty BCHD pierasłali ŭ KDB i Hienieralnuju prakuraturu Biełarusi pietycyju z patrabavańniem terminova vyzvalić ksiandza Uładzisłava Łazara. Tekst pietycyi byŭ raźmieščany 1 žniŭnia na śpiecyjalnaj internet-płatformie dla hałasavańnia change.org. Na 13 žniŭnia jaje padpisali bolš za tysiaču čałaviek. Jak adznačajecca ŭ pietycyi, niezrazumieła, u čym mienavita abvinavačvajuć ksiandza. «Uvieś hety čas, niahledziačy na patrabavańni hramadskaści i ažyjataž u ŚMI, KDB uporna zachoŭvaje maŭčańnie pa hetaj spravie. My ličym, što aryšt śviatara źjaŭlajecca sprobaj šantažu katalickaha kaścioła ŭ Biełarusi i zapałochvańnia biełaruskaha hramadstva. U suviazi z hetym my patrabujem nieadkładnaha vyzvaleńnia ksiandza Uładzisłava Łazara», — havorycca ŭ pietycyi.

Dniom raniej sustaršynia arhkamiteta BCHD Vital Rymašeŭski i Dzianis Sadoŭski pieradali ŭ Hienprakuraturu zvarot za podpisami 30 čałaviek z prośbaj adkazać na nastupnyja pytańni: na jakoj padstavie zatrymany Łazar; u čym jon abvinavačvajecca i što jamu inkryminujecca; nakolki zakonnaje jaho ŭtrymańnie ŭ śledčym izalatary KDB i ci mahčyma jaho vyzvaleńnie na ŭmovach padpiski ab niavyjeździe abo damašniaha aryštu.

Pra zatrymańnie ksiandza stała viadoma praź niekalki dzion paśla taho, jak Alaksandr Łukašenka 26 lipienia paviedamiŭ žurnalistam: supracoŭnik biełaruskich śpiecsłužbaŭ zatrymany za pracu na zamiežnyja dziaržavy. «My niadaŭna zatrymali adnaho sa zdradnikaŭ, jaki ŭ śpiecsłužbach słužyŭ i jaki byŭ praz pradstaŭnikoŭ katalickaj carkvy źviazany z zamiežnymi dziaržavami, i nie tolki zdavaŭ infarmacyju, ale z-za jaho dziejnaści paciarpieli ludzi, jakija pracujuć za miažoj», — skazaŭ Łukašenka.

29 lipienia infarmacyju ab zatrymańni ksiandza Łazara paćvierdziŭ pradstaŭnik Rymska-katalickaha kaścioła ŭ Biełarusi. «My viedajem pra hety fakt, ale nie majem dakładnaj infarmacyi, za što jon zatrymany. Čakajem, kali źjavicca aficyjnaje paviedamleńnie», — skazaŭ časovy vykanaŭca abaviazkaŭ pres-sakratara Kanfierencyi katalickich biskupaŭ u Biełarusi Juryj Sańko. Pavodle jaho słoŭ, sprava znachodzicca «ŭ rukach dziaržaŭnych orhanaŭ, u pryvatnaści joju zajmajecca nuncyjatura» (pasolstva Vatykana ŭ Minsku). Na pytańnie, ci źviazana zatrymańnie Łazara sa špijonskim skandałam, pra jaki paviedamiŭ Łukašenka, Sańko adkazvać nie staŭ, spasłaŭšysia na niedachop infarmacyi.

12 žniŭnia internet-resurs «Telehraf» paviedamiŭ, što pošta, nakiravanaja Uładzisłavu Łazaru ŭ minski śledčy izalatar KDB, viartajecca nazad. Heta dało padstavu mierkavać, što aryštavanaha ksiandza ŭ SIZA KDB užo niama. Nie vyklučana, što jon pieraviedzieny ŭ inšuju ŭstanovu papiaredniaha źniavoleńnia.

KDB admaŭlajecca ad lubych kamientaryjaŭ pa hetaj spravie.

Ksiondz Uładzisłaŭ Łazar (śvieckaje imia Uładzimir Łazar) — hramadzianin Biełarusi, vučyŭsia ŭ Hrodzienskaj sieminaryi, zatym u Polščy. U krasaviku hetaha hoda byŭ pryznačany administratram z pravami probašča parafii Spasłańnia Duchu Śviatoha ŭ Barysavie. Raniej Łazar słužyŭ u Marjinaj Horcy i Rudziensku (Puchavicki rajon Minskaj vobłaści).

• 0
• 0
• 0
• 0
• 0
• 0
• 0
• 0