U Kramli ŭžo ŭsio vyrašyli?
Maskva kali i maje ŭ šufladzie niejkija scenary, to dobra razumieje ciažkaści realizacyi. Tamu nia idzie na abardaž, a starajecca spakvala ŭziać toje, što možna ŭziać. Piša ŭ svaim błohu Alaksandar Kłaskoŭski.
Suśvietnyja medyi adznačyli: učora na pasiadžeńni rasiejskaha ŭradu ŭpieršyniu staršyniavaŭ Siarhiej Ivanoŭ (Fradkoŭ u adpačynku).
U naziralnikaŭ umacoŭvajecca mierkavańnie, što Pucin vyznačyŭsia ź pierajemnikam. Pradkazvajuć, što nieŭzabavie Ivanoŭ moža zaniać kresła premjera, jakoje vyhladaje idealnym tramplinam.
Adznačajuć, što za apošni čas jahony rejtynh rezka vyras. Pavodle Lavady-centru, inšy čałaviek z abojmy imaviernych nastupnikaŭ Pucina — Dźmitry Miadźviedzieŭ, taksama pieršy vice-premjer (mienavita jon, darečy, raniej vioŭ pasiedžańni ŭradu, kali nie było Fradkova) užo prykmietna sastupaje Ivanovu što da elektaralnaj papularnaści. Kali ŭmoŭnamu liberału Miadźviedzievu zaraz addali b hałasy 29% rasiejcaŭ, to typovamu pradstaŭniku čekisckaj kasty Ivanovu — užo 37%. Hetyja trendy rejtynhaŭ vyhladajuć kiravanymi. Va ŭmovach žorstkaha kantrolu nad elektronnymi medyjami raskrutka peŭnaj fihury jość u vyrašalnaj stupieni spravaj techniki.
Apošnim časam u ekspertnym asiarodździ musujecca pytańnie, ci stanie, maŭlaŭ, Pucin pieradavać u spadčynu nastupniku, niezaležna ad proźvišča, biełaruskuju prablemu ŭ jaje ciapierašnim vyhladzie (eŭfemizm, dumajecca, prazrysty). Tut jość momant spekulacyi. Bo Kreml choć i maje šmat mocy roznaha kštałtu — ad naftadalaraŭ da specyfičnaha arsenału specsłužbaŭ, usio nia tak prosta.
Zrazumieła, što Maskvie chaciełasia b mieć u Miensku — skažam tak — bolej zhavorlivaha, pradkazalnaha partnera. Ale nu jak ty zładziš tuju źmienu ŭłady? Nie vysadžvać ža, nasamreč, na parašutach Pskoŭskuju dyviziju! Namenklaturny pieravarot — taksama małaimavierny, usie siadziać jak myš pad miatłoj. Revalucyja? Narod vyjdzie na vulicy chiba što ŭ vypadku žachlivaha ekanamičnaha abvału, a Maskvie nie patrebnaja katastrafičnaja kraina pad bokam. Zastajecca ci nie adziny varyjant — palityčny prajekt, jaki naležyć realizoŭvać unutry krainy. To bok — pavodle tych praviłaŭ hulni, što nakidajucca dziejnaj uładaj. A tut usio schoplena.
Karaciej, Maskva kali i maje ŭ šufladzie niejkija scenary, dyk dobra razumieje ciažkaści realizacyi. Tamu nia idzie na abardaž, a starajecca spakvala ŭziać toje, što možna ŭziać. Heta možna nazvać metodaj ekanamičnaha presynhu z palityčnym składnikam.
U sporcie presynh užyvajecca, kab źniasilić supiernika, prymusić jaho pamylacca. Ale možna narvacca i na efektyŭnuju kontarhulniu. My ŭžo nie adnojčy bačyli kinžalnyja pijaraŭskija kontarataki.
Nervovy, viazki matč całkam moža pierajści ŭ fazu Łukašenka — Ivanoŭ (ci Miadźviedzieŭ, što niepryncypova, bo padzieł na "hałuboŭ" dy "iastrabaŭ" u kramloŭskaj kamandzie nadta ŭmoŭny). Luby nastupnik praciahnie tuju ž suvora-prahmatyčnuju liniju ŭ biełaruskim pytańni. Razam z tym, luboj novaj fihury na čale Rasiei ŭžo nie zakinieš zdradu intehracyjnym zapavietam Jelcyna (pad hetu pijaraŭskuju antytezu rehularna traplaje ŭ mienskich filipikach Pucin). Eŭfaryčnaje bićcio čarak u Kramli stała ŭžo niečym kštałtu hreckaha mitu.
«Dekałanizacyja — heta pryjści i zaniać svajo miesca». Nasta Rahatko budzie ŭdzielničać u fiestyvali rasijskaj knihi. Sulima jaje asudziŭ, jana nie zmaŭčała ŭ adkaz5757
«Dekałanizacyja — heta pryjści i zaniać svajo miesca». Nasta Rahatko budzie ŭdzielničać u fiestyvali rasijskaj knihi. Sulima jaje asudziŭ, jana nie zmaŭčała ŭ adkaz57
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4949
Kamientary