Pieśniary ŭ trunach pieraviarnulisia

Pamiatajecie stary niepalitkarektny anekdot pra žychara adnoj susiedniaj krainy, jaki aburajecca, što maskali jahonaje rodnaje "pyvo" abzyvajuć "pivom"? Zaraz skažu, čamu heta krucicca ŭ mianie ŭ hałavie.

A pakul što — maleńki test. Adhadajcie, čyje heta słovy (cytuju ŭ aryhinale, na narkamaŭcy): "Saviet Ministraŭ Respubliki Biełaruś prapanuje pryniać "Praviły biełaruskaj arfahrafii i punktuacyi" ŭ vyhladzie zakona. Ale nakolki abhruntavany vybar mienavita takoj formy, bo jana ž vybirajecca tolki ŭ tym vypadku, kali adpaviednyja adnosiny nielha rehłamientavać inšymi narmatyŭnymi pravavymi aktami?.. Raniej padobnyja dakumienty zaćviardžalisia nie parłamientam u formie zakona, a pastanovami Savieta Ministraŭ. My taksama schilajemsia da apošniaha, tamu što pastanova Saŭmina — bolš hibki i apieratyŭny dakumient. Kali ŭ joj vyjaŭlajecca niejkaja niedarečnaja pamyłka, ci na praktycy nie spracoŭvaje niejki artykuł, to ŭniesci źmianienni ŭ pastanovu značna praściej i chutčej, čym u zakon. Pračytaŭšy ž prajekt Pravił, jaki prajšoŭ užo mnoha instancyj, my, nie navukoŭcy, znajšli ŭ im šerah niestykovak i supiarečnaściaŭ i navat zvyčajnych hramatyčnych pamyłak. A kolki ich my prapuscili?...I što budzie, kali niezaŭvažanyja pamyłki zamacujucca zakonam?.. Navat žudasna ŭjavić. Strašenny soram budzie pierad prodkami, sučasnikami i naščadkami za ździek nad movaj".

Nikoli nie zdahadajeciesia. Heta ź interviju, što daŭ "Źviaździe" ŭ traŭni — niejkich paru miesiacaŭ tamu! — Uładzimier Zdanovič, staršynia parlamenckaj kamisii ŭ pytańniach adukacyi. Hetuju ž dumku jon vykazaŭ tady i karespandentcy BIEŁTA: maŭlaŭ, kab nie pierahnuć kij, lepiej aformić novyja praviły pastanovaj!

Ale potym pazycyja rezka źmianiłasia. Niadaŭna kamisija rekamendavała prajekt na vosieńskuju sesiju. Pryčym zaraz deputaty davodziać: patrebien mienavita zakon. Inačaj, maŭlaŭ, prablematyčna pastavić na miesca tych, chto ździekujecca z movy (čytaj: užyvaje neaklasyčny pravapis).

Što ž prymusiła (ci chto prymusiŭ) adkinuć całkam słušnyja sumnievy? Kamu tak zakarcieła zajmieć mienavita zakanadaŭčy dručok suprać ładnaj častki śviadomaj biełaruskamoŭnaj publiki? Zaŭvažcie: namiery parlamentaroŭ aburyli i tych naviednikaŭ sajtu "NN", što nia ličać siabie adeptami taraškievicy. Aburaje mienavita padychod, hety śvierb administravańnia ŭ dalikatnaj sfery.

Kładučy ruku na serca, u mianie vialikija sumnievy, što heta nakidajecca z samaha vierchu. Tam staje zaraz inšych prablemaŭ. Tak ci inačaj, artahrafičnaje dubałomstva tolki abvostryć kanfrantacyju ŭ hramadztvie. Kaniešnie, filolahi-neaklasyki nia stanuć budavać barykady:) Ale prorva miž uładaj i nacyjanalna śviadomaj intelihiencyjaj (termin umoŭny) tolki pahłybicca. Tak i nie mahu, kali ščyra, da kanca ŭciamić: nu našto heta ŭładzie?

Anekdot ža pra "pyvo" dy "pivo" zhadvajecca, kali čytaju vykazvańni pramoŭteraŭ novaha artahrafičnaha zakonu. Im, bač, spać nie daje toje, što "parłamient" chtości dazvalaje sabie nazyvać "parlamentam".

Heta ci nie adziny artykulavany pradstaŭnikami ŭłady prykład taho "ździeku z movy", dziela spynieńnia jakoha, maŭlaŭ, i varta pryniać strohi zakon.

Toje, što ichni parłamient nia ciahnie na rolu paŭnavartasnaha zakanadaŭčaha orhana z pryčyny svajoj kišennaści, słuhaŭ narodu, zaŭvažcie, nia torhaje. Zrešty, na hetu temu tolki zaiknisia — mała nia zdasca! Skazana ž vusnami hałoŭnaha načalnika na "razbory palotaŭ" u KHB: inšych centraŭ siły nie paciarplu!

Tak što parlamentary buduć advažna vajavać ź cieniem zabitaha stalinskaj systemaj Taraškieviča. Dy jašče — vo dažylisia! — pad prykryćciom imionaŭ Kupały i Kołasa: maŭlaŭ, symbalična budzie ŭparadkavać pravapis mienavita ŭ hod jubileju pieśniaroŭ!

Pieśniary, čyje lepšyja tvory pabačyli śviet mienavita na taraškievicy, ad takoj zhadki, musić, u trunach pieraviarnulisia.

• 0
• 0
• 0
• 0
• 0
• 0
• 0
• 0