Staršynia rady dyrektaraŭ «Biełzamiežbuda», kiraŭnik Trastbanka vyrašyŭ svaje spravy z pravaachoŭnymi orhanami.
«Pavodle majoj infarmacyi, kiraŭnictva [krainy] Viktara Šaŭcova amnistavała. Jakim čynam heta adbyłosia, ci płaciŭ jon adkupnyja, ja nie viedaju», - skazała krynica ŭ bankavych kołach. «Dniami znajomyja kazali, što bačyli jaho ŭ kantory», - dadaŭ padnačaleny Šaŭcova.
U KDB Biełarusi nie zmahli dać kamientar na hety kont.
U Trastbanku taksama admovilisia kamientavać situacyju z Šaŭcovym.
Infarmacyja ab zatrymańni Viktara Šaŭcova źjaviłasia ŭ kastryčniku 2011 hoda. U śniežni Łukašenka paćvierdziŭ, što ŭ dačynieńni da biznesoŭca zaviedzienaja «zvyčajnaja kryminalnaja sprava», źviazanaja z vyvadam hrošaj i pravaparušeńniem u suviazi z budaŭnictvam abjekta ŭ Vieniesuele. Pry hetym jon dadaŭ, što «hety spadar nie ŭpieršyniu traplaje ŭ pole zroku pravaachoŭnych orhanaŭ, ale jaho mohuć vyzvalić paśla kampiensacyi škody ŭ «dvuch-trochrazovym pamiery».
Paźniej namieśnik načalnika pres-słužby KDB Biełarusi Artur Strech zajaviŭ, «pavodle papiaredniaj acenki śledstva, suma vykradzienych hrašovych srodkaŭ pierasiahaje 10 młn dalaraŭ». U dačynieńni da Šaŭcova była abranaja miera strymańnia ŭ vyhladzie źmiaščeńnia pad vartu ŭ śledčy izalatar KDB. U sakaviku hetaha hoda źjaviłasia infarmacyja, što biznesoviec na pratekcyju kiraŭnika Biełaruskaj Pravasłaŭnaj Carkvy Fiłareta źmieščany pad chatni aryšt. Nadoječy Šaŭcoŭ za dabračynnuju dziejnaść byŭ uznaharodžany najvyšejšaj uznaharodaj BPC - ordenam śviatoha Kiryły Turaŭskaha, a jahonaja žonka Alena - miedalom Jefrasińni Połackaj.
Viktar Šaŭcoŭ viadomy praz realizacyju supolnych ź biełaruskaj dziaržavaj prajektaŭ u Iraku, Iranie, Livii, Vieniesuele dy inšych haračych punktach. Jon byŭ asabista znajomy z Sadamam Chusejnam, Muamaram Kadafi, Uham Čavesam, Rafikam Charyry.
«Biełzamiežbud» byŭ zasnavany ŭ 2007 hodzie i źjaŭlajecca hałoŭnym trymalnikam kantraktaŭ na pastaŭku ŭ Vieniesuełu biełaruskich tavaraŭ i vykanaŭcam va ŭsich supolnych budaŭničych prajektach.
Kamientary