25‑гадовага каардынатара IT-праектаў па вяртанні з Польшчы асудзілі за «садзейнічанне экстрэмізму»
Ярамір Пуціцкі працаваў у буйных кампаніях сектара інфармацыйных тэхналогій і жыў у Польшчы. Нядаўна стала вядома пра вынесены яму прысуд у Мінскім гарадскім судзе.
Ярамір Пуціцкі нарадзіўся ў 2001 годзе. У 2022 годзе ён скончыў Беларускі дзяржаўны эканамічны ўніверсітэт па спецыяльнасці «Міжнародная эканоміка». Свой працоўны шлях хлопец пачынаў у МТБанку яшчэ падчас вучобы, пасля звязаў кар'еру з лічбавымі тэхналогіямі.
Большую частку прафесійнага досведу Ярамір атрымаў у кампаніі Innowise, дзе пачынаў з пазіцыі асістэнта ў продажах і дарос да старэйшага каардынатара праектаў (Senior Project Coordinator). Акрамя гэтага, ён супрацоўнічаў з такімі кампаніямі, як Oxagile, Vention і Creally. Апошнія гады хлопец жыў і працаваў у Варшаве.
Яго затрымалі на пачатку гэтага года — выглядае, пасля таго як ён прыехаў у Беларусь. Судзілі Пуціцкага ў Мінскім гарадскім судзе па частках 1 і 2 артыкула 361‑4 Крымінальнага кодэкса Беларусі — «садзейнічанне экстрэмісцкай дзейнасці».
Яму прысудзілі хатнюю хімію.
Масавыя палітычныя рэпрэсіі ў краіне пачаліся пасля 2020 года. Тады Аляксандр Лукашэнка прайграў Святлане Ціханоўскай, але не аддаў ёй улады, а змусіў яе выехаць за мяжу. Адбыліся масавыя народныя пратэсты супраць дыктатуры і фальсіфікацыі выбараў. На гэта ўлады адказалі рэпрэсіямі.
Паводле падлікаў аб'яднання сілавікоў «Белпол» і праваабаронцаў, вядомыя імёны як мінімум 10050 чалавек, якія падпалі пад палітычна матываваныя крымінальныя справы. Усяго тыя ці іншыя палітычныя рэпрэсіі (крыміналкі, адміністратыўкі, звальненні, ператрусы, вымушаная эміграцыя) закранулі сотні тысяч беларусаў.
«Экстрэмізмам» улады Беларусі лічаць патрабаванне правесці свабодныя выбары з празрыстым падлікам галасоў, а таксама практычна ўсялякую крытыку ўладаў, прарасійскіх гістарычных наратываў, праявы салідарнасці з Украінай, антываенныя выступы.
«Наша Нiва» — бастыён беларушчыны
ПАДТРЫМАЦЬ
Каментары