Беларуса ў жаданні абмежаваць паўсюдную рэкламу казіно падтрымала Мінгандлю. Але прапагандысты параілі яму «не лезці не туды»
У Беларусі могуць узмацніць абмежаванні на рэкламу ігральнага бізнэсу. Адпаведныя папраўкі ў заканадаўства ўжо распрацаваныя профільным міністэрствам. Аднак сама ініцыятыва грамадзян знізу выклікала рэзкае раздражненне ў Мукавозчыка.
Жыхар Маладзечна Ігар Барысёнак накіраваў звароты ў міністэрствы культуры, інфармацыі і антыманапольнага рэгулявання і гандлю (МАРГ) з прапановай цалкам забараніць рэкламу ігральных устаноў у краіне. Атрыманы ад МАРГ афіцыйны адказ ён апублікаваў на сваёй старонцы ў Facebook.
У дакуменце ведамства тлумачыць, што цяперашні закон «Аб рэкламе» не ўтрымлівае поўнай забароны на прасоўванне казіно і букмекераў. Існуюць толькі кропкавыя абмежаванні: такую рэкламу нельга размяшчаць на будынках школ, бальніц, спартыўных аб'ектаў, на дзіцячых цацках, а на тэлебачанні і радыё яна дазволеная толькі ў начны час — з 21:00 да 7:00. Вонкавая рэклама і рэклама ў інтэрнэце застаюцца практычна неабмежаванымі.
Тым не менш, у МАРГ афіцыйна заявілі, што «падзяляюць апасенні» грамадзяніна. Ведамства паведаміла, што ўжо распрацавала прапановы па ўвядзенні дадатковых абмежаванняў на размяшчэнне і распаўсюджванне рэкламы ігральных устаноў. Цяпер гэтыя змены ў закон павінны прайсці працэдуру разгляду і ўзгаднення сумесна з іншымі зацікаўленымі дзяржаўнымі органамі. Канкрэтныя тэрміны і дэталі новых забарон у адказе не ўдакладняюцца.
Калумніст выдання «СБ. Беларусь сегодня», прапагандыст Андрэй Мукавозчык прысвяціў скарзе актывіста асобны артыкул.
Прапагандыст не стаў крытыкаваць саму рэкламу казіно, з якіх корміцца рэжым, які корміць яго, а абрынуўся на аўтара звароту, назваўшы такіх людзей «турбапатрыётамі, якім надакучыла рабіць сваю справу». Галоўная прэтэнзія Мукавозчыка звялася да таго, што грамадзянін накіраваў лісты адразу ў тры міністэрствы, не разабраўшыся, што ўзгадненнем вонкавай рэкламы на месцах займаюцца выканкамы.
У сваім тэксце Мукавозчык адкрыта папярэдзіў беларусаў аб наступствах залішняй грамадзянскай актыўнасці. Ён параіў «не ствараць адно аднаму лішніх праблем» і «не лезці не туды нават з самых найлепшых памкненняў». У якасці аргумента прапагандыст прыгразіў, што скаргі грамадзян у дзяржаўныя органы могуць прывесці да таго, што ва ўладаў з'явіцца «спакуса гэтую свабоду падкарэктаваць».
Мінскія ўлады расказалі, як будуць змагацца з «акіянам аўтамабіляў» у дварах2
Каментары