Беларусы расказалі пра сямейны бюджэт і выдаткі на іпатэку ў Польшчы

У Беларусі Ганна шмат гадоў працавала ў аддзеле кадраў. Пераехаўшы ў Польшчу, яна амаль адразу зарэгістравала ІП і пачала дапамагаць замежнікам з працаўладкаваннем. Таксама жанчына паступіла ва ўніверсітэт і атрымала дыплом бакалаўра па напрамку «кіраванне чалавечым капіталам».

На пачатку гэтага года Ганне прапанавалі месца ў аддзеле кадраў — і яна пагадзілася, вырашыўшы сумяшчаць працу па найме з прыватнай дзейнасцю.

За поўную стаўку Ганна атрымлівае 5 тыс. злотых ($1317) на месяц. Даход ад прадпрымальніцкай дзейнасці цяпер непастаянны. У сярэднім ІП прыносіць дадаткова 1,5—2 тыс. злотых ($395—527) на месяц.

Сямейны бюджэт у Ганны з мужам супольны. Мужчына зарабляе на месяц каля 6,5 тыс. злотых ($1712).

Акрамя таго, сям’я штомесяц атрымлівае дапамогу на дачку сумай 800 злотых ($211).

Такім чынам, сукупны даход сям’і складае каля 14 тыс. злотых ($3 687) на месяц.

Выдаткі

• Іпатэка, камунальныя паслугі і рамонт — 4 100 злотых ($1 080).
• Іншыя выдаткі, звязаныя з купляй кватэры, — каля 3,5 тыс. злотых ($922).
• Харчаванне і бытавая хімія — каля 3 тыс. злотых ($790).
• Транспарт — 380 злотых ($100).
• Догляд сябе і здароўе — 1 010 злотых ($266).
• Адзенне і абутак — 200 злотых ($53).
• Школа і захапленні дачкі — 760 злотых ($200).
• Забавы — 1 тыс. злотых ($263).
• Іншыя выдаткі — 120 злотых ($32).

Кватэра

Сям’я Ганны жыве ва ўласнай кватэры, набытай зусім нядаўна ў іпатэку.

— Старэнькае другаснае жыллё ў старэнькім доме. 50 квадратных метраў, тры пакоі, — апісвае Ганна.

Штомесячны плацеж за іпатэку складае 2 тыс. злотых ($527). Яшчэ 1 100 злотых ($290) ідзе на аплату камунальных паслуг. Высокі кошт Ганна звязвае якраз з тым, што кватэра знаходзіцца ў старым доме.

За інтэрнэт сям’я пакуль не плаціць. Пры яго падключэнні першыя шэсць месяцаў ён бясплатны. Пасля заканчэння гэтага часу трэба будзе плаціць 70 злотых ($18).

Кожны месяц Ганна з мужам імкнуцца выдзяляць каля 1 тыс. злотых ($263) на рамонт.

— Пераробліваем патроху пад сябе, — кажа беларуска. — Адразу як заехалі — памянялі падлогу ў вітальні, потым адшліфавалі аўтэнтычную падлогу ў залі — зрабілі яе больш сучаснай. Фарбавалі сцены.

Харчаванне

Ганна ніколі не вяла строгі ўлік выдаткаў на прадукты. Усе сямейнікі бяруць у крамах тое, што хочуць, ні ў чым сабе не адмаўляючы.

— Паесці мы любім, — усміхаецца жанчына.

Прыкладна раз на тыдзень сям’я выбіраецца паабедаць па-за домам.

— Можам выйсці на шпацыр — і завітаць на абед у бар млечны (фармат недарагіх кавярняў. — Заўв. MOST). Там за траіх выходзіць прыкладна 80 злотых ($21), — расказвае Ганна. — А бывае, ходзім у піцэрыю, рэстаран ці кавярню. Апошні раз плацілі 125 злотых ($33).

Агулам на прадукты, паходы ў кавярню і рэстараны, а таксама бытавую хімію, якую купляюць заадно з прадуктамі, сям’я траціць каля 3 тыс. злотых ($790) на месяц.

Транспарт

У сям’і ёсць аўтамабіль, якім у асноўным карыстаецца муж Ганны: кожны дзень ён ездзіць на ім на працу. Па патрэбе машыну таксама выкарыстоўваюць для сямейных паездак.

Поўны бак запраўляюць раз на месяц. На паліва ідзе каля 300 злотых ($79).

Ганна і дачка рэгулярна карыстаюцца грамадскім транспартам. Для дзяўчынкі-школьніцы праезд бясплатны.

— Я жыву недалёка ад працы. На аўтобусе дабіраюся раніцай, а пасля працы іду пешшу, калі добрае надвор’е, — кажа яна. — Праезд абыходзіцца прыкладна на 80 злотых ($21) за месяц.

Догляд за сабой і здароўе

Штомесяц Ганна з дачкой робяць манікюр. На дваіх ён каштуе 150 злотых ($39).

Дадаткова сям’я рэгулярна купляе касметыку: спецыяльныя дэрматалагічныя шампуні, а таксама крэмы для твару і тонікі. На гэтыя сродкі ідзе каля 300 злотых ($79) на месяц.

Раз на тры месяцы Ганна наведвае салон прыгажосці, дзе робіць стрыжку і фарбаванне валасоў. Гэта абыходзіцца на 300 злотых ($79). Муж жанчыны ходзіць да цырульніка штомесяц і плаціць за стрыжку 60 злотых ($16).

Акрамя таго, сям’я аплачвае пашыраны медыцынскі пакет коштам 250 злотых ($66) за месяц, а таксама спартыўны абанемент — яшчэ 150 злотых ($39).

Вопратка і абутак

Вопратку і абутак сям’я купляе па меры патрэбы, але яна ўзнікае амаль кожны месяц. У сярэднім на гэта ідзе 200 злотых ($53).

— Проста пераборліва глядзім у шафу і правяраем, што нам трэба абнавіць. У адным месяцы купляем аднаму, у наступным — іншаму, — кажа Ганна. — Усё вельмі даступна. Няма такога, як у Беларусі, што трэба планаваць бюджэт, каб штосьці сабе купіць.

Школа і захапленні дачкі

Дачка Ганны займаецца тэнісам двойчы на тыдзень. Заняткі каштуюць 280 злотых ($74) за месяц. Яшчэ столькі ж бацькі плацяць за курсы малявання.

Харчаванне ў школе абыходзіцца сям’і на 100 злотых ($26). Дзяўчынка таксама часам ездзіць у паездкі з класам.

— Бывае 50 злотых ($13), а бывае і 800 ($211) за месяц, — ацэньвае Ганна гэты артыкул выдаткаў. — Думаю, калі браць у сярэднім, то гэта мінімум 100 злотых ($26).

Забавы

У цёплы час года, калі дазваляе надвор’е, сям’я аддае перавагу бавіць вольны час на прагулках або катацца на веласіпедах.

Часам яны выбіраюцца ў кіно. Такі паход звычайна абыходзіцца прыкладна на 100 злотых ($26) — гэта квіткі і папкорн.

Акрамя таго, сям’я імкнецца рэгулярна падарожнічаць: ездзіць у суседнія гарады і ў больш працяглыя паездкі на выходныя. Сумы атрымліваюцца розныя, але гэта заўсёды мінімум 1 тыс. злотых ($263): дзесьці больш даводзіцца траціць на квіткі, а дзесьці — на пражыванне.

— Вось нядаўна ездзілі на сустрэчу з сябрамі, спыняліся ў гатэлі. За квіткі ў абодва бакі заплацілі 400 злотых ($105), а за ноч у гатэлі — 600 ($158), — успамінае беларуска.

Іншыя выдаткі

Дадатковых выдаткаў, акрамя мабільнай сувязі, у сям’і практычна няма. За тэлефонную сувязь кожны сямейнік плаціць па 35 злотых ($9) за месяц. Акрамя таго, Ганна асобна аплачвае працоўны нумар — гэта яшчэ 15 злотых ($4) штомесяц.

Ганна кажа, што ўсё, што ўдавалася адкладваць у апошнія месяцы, цалкам ішло на патрэбы, звязаныя з купляй кватэры.

• 11
• 0
• 0
• 0
• 1
• 1
• 0
• 0