Ціханоўская: Ізалюючы дыктатараў, мы павінны інвеставаць у людзей і іх еўрапейскія памкненні
Дэмакратычная лідарка Беларусі знаходзіцца з візітам у Бруселі, дзе сёння выступіла на пленарнай сесіі Еўрапейскага эканамічнага і сацыяльнага камітэта, прысвечанага ўстойлівасці ўсходніх памежных рэгіёнаў ЕC.
У сесіі таксама ўзялі ўдзел віцэ-міністарка фінансаў Літвы Нерынга Рынкявічуце Лаўрынайцене і намеснік генеральнага дырэктара Еўрапейскай камісіі рэгіянальнай і гарадской палітыкі Угу Сабрал, паведамляе прэс-служба Святланы Ціханоўскай.
Сустрэча была прысвечаная ўмацаванню бяспекі, устойлівасці і развіццю краін на ўсходняй мяжы ЕС.
Падчас выступу лідарка адзначыла, што беларусы ўжо шмат гадоў змагаюцца за тыя ж каштоўнасці, на якіх будуецца ЕС.
Яна падкрэсліла, што рэжым Лукашэнкі мэтанакіравана ізалюе беларусаў ад Еўропы, знішчае незалежныя інстытуты і пераследуе ўсё, што ўмацоўвае нацыянальную ідэнтычнасць.
Ціханоўская заклікала захоўваць ціск на рэжым да рэальных сістэмных змен, падтрымліваць беларускую грамадзянскую супольнасць, незалежныя медыя, культуру і адукацыйныя праграмы. Асобна яна прапанавала паглыбіць супрацоўніцтва паміж дэмакратычнымі сіламі Беларусі і EESC, каб рыхтавацца да будучых рэформаў і еўрапейскай інтэграцыі краіны.
«Ізалюючы дыктатараў, мы павінны інвеставаць у людзей і іх еўрапейскія памкненні. Чым мацнейшая грамадзянская супольнасць, тым слабейшая дыктатура», — заявіла Святлана Ціханоўская.
«Дапамажыце нам пашыраць беларускую культуру, мову і ідэнтычнасць праз выставы, культурныя дні, адукацыйныя праграмы і абмены. Давайце разам працаваць над кампаніямі ў падтрымку палітвязняў, незалежных журналістаў, правоў працоўных, правоў чалавека і супраць дэзынфармацыі. Давайце забяспечым, каб Беларусь была часткай больш шырокіх еўрапейскіх дыскусій пра бяспеку, дэмакратыю, суверэнітэт і будучыню Еўропы. Давайце ўмацуем сувязі паміж нашымі арганізацыямі грамадзянскай супольнасці праз азнаямленчыя візіты, партнёрства і сумесныя праекты», — сказала палітык.
Каментары
И когда подросла, она восстала против Лукашенко.