Паўтара дзясятка беларусаў і расіян затрымалі за махінацыі з дарагой маскоўскай нерухомасцю
Аб раскрыцці міжнароднай сеткі шэрых рыэлтараў паведаміў СК.
Гісторыя пачалася з таго, што 59‑гадовы ўраджэнец Міншчыны з багатым крымінальным мінулым, судзімы за рабаванні, згвалтаванне і крадзяжы, пасля чарговага тэрміну перабраўся ў Расію. Там ён выкарыстаў свае сувязі ў крымінальным свеце і сабраў банду.
Першапачаткова саўдзельнікі зараблялі на падробках: яны выраблялі ў Беларусі падробленыя пячаткі, штампы і дакументы, а затым адпраўлялі іх кур'ерамі пакупнікам у Расію.
З часам злачынцы перайшлі да больш буйных маштабаў. Падробкі сталі выкарыстоўваць у Расіі, каб афармляць спадчыну на кватэры памерлых альбо тых людзей, якія вельмі доўга адсутнічалі.
Мэтай была элітная маскоўская нерухомасць, а ролі сваякоў выконвалі падстаўныя асобы.
Такім чынам банда паспела захапіць чатыры кватэры ў Маскве агульнай вартасцю каля 3,2 мільёна беларускіх рублёў, аднак прадаць іх і зарабіць на гэтым фігуранты не паспелі.
На тэрыторыі Беларусі былі затрыманыя чатыры ўдзельнікі банды. У дачыненні да іх завялі крымінальныя справы за стварэнне злачыннай арганізацыі альбо ўдзел у ёй, што пагражае тэрмінам да 13 гадоў зняволення. Астатніх, уключаючы самога лідара банды, узялі пад варту ў Расіі. Усяго сілавікі выкрылі 16 удзельнікаў гэтай крымінальнай сеткі.
Каментары