«Некалькі стрэлаў з блізкай адлегласці і адзін — каб дабіць». Польская паліцыя шукае забойцу мастака Сямёна Скрапецкага
Усяго было затрымана тры чалавекі, адзін з якіх ужо адпушчаны.
Паліцыя працягвае шукаць забойцу расійскага мастака і блогера, які загінуў 15 чэрвеня ў Белай-Падляшскай, піша Most.
Праваахоўнікі абверглі інфармацыю, што да забойства мае дачыненне мужчына, затрыманы каля ўваходу ў консульства Беларусі. Усяго было затрымана тры чалавекі, адзін з якіх ужо адпушчаны.
— Злачынца ўцёк з месца здарэння, — сказаў Wyborczej Анджэй Фіёлэк з паліцыі Люблінскага ваяводства.
У паліцыю былі дастаўленыя тры чалавекі, якія маглі быць сведкамі або мець інфармацыю, важную для следства. Адзін з іх ужо адпушчаны. Адзін з затрыманых займаўся перавозкай людзей. Ці ён на волі, ці нехта іншы — не паведамляецца.
Як распавёў парталу Onet ананімны супрацоўнік польскіх службаў, мужчыну забілі стрэламі з блізкай адлегласці.
— Гэта выглядала як пакаранне. Некалькі стрэлаў з блізкай адлегласці і адзін — каб дабіць, — сказала крыніца. — Расіянін шмат пісаў у сацыяльных сетках пра тое, дзе ён будзе. На жаль, быў лёгкай цэллю, — дадаў ён.
Нагадаем, 15 чэрвеня каля 10 раніцы ў Белай-Падляшскай, быў забіты 44‑гадовы антыпуцінскі мастак-карыкатурыст, бард, акцыяніст і блогер Сямён Скрапецкі (сапраўднае імя — Роберт Кузаўкоў). У сваіх работах і перформансах ён крытыкаваў расійскія ўлады, у тым ліку Уладзіміра Пуціна і кіраўніка Чачні Рамзана Кадырава. Некаторыя з яго работ былі прысвечаныя Аляксандру Лукашэнку.
Каментары