Naviband ужо год не могуць выехаць з Польшчы і двойчы пераносілі еўрапейскі тур
Нядаўна гурт выпусціў новую песню.
Беларускі гурт Naviband ужо больш за год чакае дакументаў і таму пакуль выступае толькі ў Польшчы. За гэты час музыкам давялося двойчы перанесці еўрапейскі тур.
Пра гэта Арцём і Ксенія расказалі пасля вялікага сольнага канцэрта ў Варшаве, які ледзь не сарваўся — за некалькі дзён да выступу Ксенія Жук амаль цалкам страціла голас. Па словах музыкаў, падобная сітуацыя адбываецца ўжо не ўпершыню, але гэтым разам прыйшлося нават звяртацца да доктара.
«Зараз усё ў парадку. Гэта не першы выпадак, таму схема, каб вярнуць голас, прапрацаваная. Звычайна ў вакалістаў гэта частае пытанне. А прыйсці ў сябе дапамагае маўчанне, практыкаванні па дыханні і падтрымка блізкіх».
Naviband ужо трэці год запар збіраюць поўную залу папулярнага музычнага клуба Progresja у Варшаве (змяшчае да 2000 чалавек). У 2024‑м яны ўпершыню вырашылі выступіць на сцэне такога вялікага клуба, адзначыўшы дзесяцігоддзе гурта. А летась там жа прэзентавалі новы альбом «Адліга». Чакаюць артыстаў і ў іншых краінах, але пакуль што выступаць за межамі Польшчы яны не могуць.
«Мы ўжо год чакаем дакументаў і даем канцэрты пакуль толькі ў Польшчы. І вельмі чакаем сустрэчы ў іншых краінах. Ведаем, што і людзі чакаюць. Прыйшлося перанесці ўжо два разы еўрапейскі тур. Дакладна ведаем, што нас чакаюць у Вільні, у Германіі і Нідэрландах, вялікае жаданне маем, каб зрабіць канцэрт у Кіеве», — распавялі музыкі.
Нядаўна выйшаў новы рэліз гурта — песня «Свой сярод чужых». Паводле Naviband, гэта гісторыя не толькі пра асабістыя перажыванні, але і пра досвед многіх беларусаў, якія сёння жывуць паміж рознымі краінамі.
«Хто цяпер я, хто цяпер ты?» — гучыць у новай песні.
«Гэта пра ўсіх нас, хто ў эміграцыі і ў Беларусі адчувае, што нешта адбываецца не так. Людзей усё больш працягваюць раздзяляць паміж так званымі «беглымі» і тымі, хто застаўся. Наўмысна ствараючы адлегласць паміж намі. Трэба знаходзіць сілы не спыняцца рабіць сваю справу і верыць, што гэтыя цёмныя часы скончацца».
Пакуль Naviband чакаюць магчымасці вярнуцца да паўнавартаснага еўрапейскага тура, музыкі працягваюць рыхтаваць новыя рэлізы і канцэрты ў Польшчы.
«Рыхтуем новы сінгл. А таксама серыю летніх канцэртаў у вельмі атмасферных месцах на адкрытых пляцоўках. Мінулы раз гэта была Варшава і Уроцлаў. Сёлета хочацца дадаць яшчэ некалькі гарадоў. Чакайце навін!».
Цяпер чытаюць
Магілёў, Віцебск і Гомель удалося далучыць да БССР толькі таму, што Масква такім чынам хацела спакусіць Заходнюю Беларусь — апублікаваныя дакументы3333
Магілёў, Віцебск і Гомель удалося далучыць да БССР толькі таму, што Масква такім чынам хацела спакусіць Заходнюю Беларусь — апублікаваныя дакументы33
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку6464
Каментары
глаза протри, уважаемый, людей без документов уже сотни, если не тысячи...
полякам-то, понятно, на это плевать... а почему плевать вам?