«Адбярыце ў гэтых неадэкватных пілу!» Як дэпутаты «навялі парадак» на гістарычных могілках у Брэсце
Маштабная акцыя па добраўпарадкаванні гістарычных могілак у Брэсце скончылася скандалам і пашкоджаннем надмагілляў. Пакуль гарадскія службы рапартавалі пра добраўпарадкаванне, жыхары горада пабачылі зусім іншую карціну: пабітыя помнікі і завалы са спілаваных дрэў проста на пахаваннях. У суботніку, пасля якога засталіся разбурэнні, удзельнічалі дэпутаты гарадскога Савета і прадстаўнікі Савета моладзі.
Берасцеец 15 сакавіка наведаў Трышынскія могілкі і застаўся ў шоку ад убачанага: пашкоджаныя помнікі, куча непрыбраных галін і распілаваных дрэў, піша BGmedia.
Пры гэтым 14 сакавіка ў межах месячніка па добраўпарадкаванні гарадскія дэпутаты прыводзілі гэты некропаль у парадак.
На Трышынскіх могілках пасля ўборкі пакінулі спілаваныя дрэвы і пашкоджаныя помнікі
Берасцеец апублікаваў 15 сакавіка ў Threads фота з Трышынскіх могілак. На іх можна заўважыць пашкоджаныя помнікі, непрыбраныя галіны і распілаваныя дрэвы.
Жыхары горада ў каментарах не хаваюць свайго абурэння:
«Адбярыце ў гэтых неадэкватных пілу! Могілкі адносяцца да гістарычных каштоўнасцяў горада!»
«Гэта абуральна. Гэтак жа пілавалі на каталіцкіх могілках, разбілі мноства помнікаў. Няўжо гарадскім уладам няма справы!? (відавочна, на жаль, што няма)».
«Продкі не задаволеныя сваімі нашчадкамі».
«Рука*опы».
«Геніяльныя кіраўнікі і таленавітыя выканаўцы. Гэта нейкая ганьба…»
У межах месячніка па добраўпарадкаванні Трышынскія могілкі «прыводзяць у парадак»
КУП «Брэсцкае спецпрадпрыемства» ўзялося за навядзенне парадку на Трышынскіх могілках у пачатку сакавіка. Напрыклад, 5 сакавіка Брэсцкае гарадское ЖКГ паведаміла, што «ў межах месячніка па санітарнай ачыстцы і ўборцы тэрыторыі Брэста сёння на Трышынскіх могілках ідзе выдаленне аварыйных дрэў і сухастою».
Там заявілі, што «работы па ўтрыманні і добраўпарадкаванні могілак «Трышынскія» ажыццяўляюцца сіламі КУП «Брэсцкае спецпрадпрыемства» ў адпаведнасці з патрабаваннямі Правіл утрымання і добраўпарадкавання месцаў пахавання, зацверджаных пастановай Міністэрства ЖКГ».
«На тэрыторыі некропаля выконваюцца работы, якія ўключаюць у сябе абразанне і фармоўку дрэў, выдаленне аварыйных дрэў, што знаходзяцца ў неналежным стане, у тым ліку інвазійных відаў. Гэты від работ праводзіцца з мэтай недапушчэння пашкоджання або разбурэння помнікаў і надмагілляў некропаля», — напісалі ў тэлеграм-канале Брэсцкага гарадскога ЖКГ.
7 сакавіка ў Брэсце правялі суботнік. Трышынскія могілкі «прыводзілі ў парадак» дэпутаты Брэсцкага гарадскога Савета.
11 сакавіка Брэсцкае гарадское ЖКГ паведаміла, што на Трышынскіх могілках «кіпіць праца па навядзенні парадку». Супрацоўнікі КУП «Брэсцкае спецпрадпрыемства» выразалі хмызнякі і інвазійныя расліны, пілавалі раней выдаленыя аварыйныя дрэвы.
«Трышынскія могілкі знаходзяцца ўздоўж галоўнай аўтамагістралі Брэста, таму яны на віду ва ўсіх жыхароў і гасцей горада. Прадпрыемства кінула вялікія сілы на гэты адказны ўчастак, каб тут быў узорны парадак. Усяго ў экалагічнай акцыі задзейнічана каля 40 работнікаў», — паведамілі ў Брэсцкім гарадскім ЖКГ.
Наступны пост пра Трышынскія могілкі з’явіўся ў тэлеграм-канале Брэсцкага гарадскога ЖКГ 14 сакавіка. У ім паведамілі, што «дэпутаты гарадскога Савета і Савет моладзі прыбіраюць смецце, выразаюць інвазійныя расліны і хмызнякі».
Выходзіць, што пашкоджаныя помнікі, галіны і распілаваныя дрэвы пакінулі пасля сябе гарадскія дэпутаты і члены Савета моладзі.
Трышынскі некропаль — унікальны «архіў пад адкрытым небам» у цэнтры Брэста
У геаграфічным цэнтры Брэста размяшчаецца найстарэйшы з захаваных некропаляў горада — Трышынскія могілкі, дзе спачывае каля 12 тысяч чалавек. Пагост стаў агульнагарадскім у 1830‑х гадах, калі стары Брэст быў знесены і перанесены на ўсход дзеля будаўніцтва Брэсцкай крэпасці. Самае старое з захаваных тут надмагілляў датуецца 1834 годам. Афіцыйна могілкі былі закрытыя для пахаванняў у 1969 годзе.
За сваю гісторыю могілкі сталі месцам спачыну многіх выдатных людзей. Акрамя таго, на тэрыторыі некропаля былі перапахаваныя астанкі больш за сотні вязняў Брэсцкага гета, а таксама спачываюць салдаты царскай і германскай армій.
З 2 жніўня 2016 года Трышынскі некропаль надзелены статусам гістарычна-культурнай каштоўнасці рэгіянальнага значэння і ахоўваецца дзяржавай.
Нягледзячы на высокі статус, многія ўнікальныя дарэвалюцыйныя надмагіллі імкліва разбураюцца. Сур’ёзны ўрон нанеслі вандалы і «чорныя капальнікі», якія дзесяцігоддзямі кралі чыгунныя элементы, крыжы і агароджы дзеля здачы на металалом. На гэты момант бюджэтных сродкаў на паўнавартасную рэстаўрацыю помнікаў няма.
Палякі купляюць дамы ў Беларусі — цікавяцца, ці хопіць на жыццё еўрапейскай пенсіі, і радуюцца смешным выдаткам9
Каментары
[Зрэдагавана]