Ніякага паломніцтва неанацыстаў: дом, дзе нарадзіўся Гітлер, ператвораць у паліцэйскі ўчастак і цэнтр правоў чалавека
Пасля дзесяцігоддзяў гарачых дыскусій улады Аўстрыі канчаткова вызначылі лёс самага спрэчнага будынка ў краіне. Дом у горадзе Браўнау-на-Іне, дзе з'явіўся на свет Адольф Гітлер, стане паліцэйскім участкам.
Чакаецца, што маштабная рэканструкцыя гістарычнага аб'екта завершыцца ў бліжэйшы час, а паўнавартасная праца паліцэйскага ўчастка пачнецца ўжо ў другім квартале 2026 года. Акрамя праваахоўнікаў, у сценах будынка таксама размесціцца навучальны цэнтр па правах чалавека. Пра гэта са спасылкай на агенцтва AFP паведамляе выданне BILD.
«Нейтралізацыя» гісторыі
Галоўная мэта такой трансфармацыі — цалкам «нейтралізаваць» гэтае месца і пазбавіць яго любога сімвалічнага значэння. У 2016 годзе спецыяльна створаная камісія разглядала розныя варыянты, у тым ліку стварэнне гістарычнага мемарыяла. Аднак ад гэтай ідэі ў выніку катэгарычна адмовіліся: улады асцерагаліся, што мемарыял можа прыцягваць неанацыстаў і ператварыцца ў месца іх паломніцтва.
Каб рэалізаваць праект, аўстрыйскаму парламенту давялося пайсці на радыкальныя крокі і прыняць спецыяльны закон аб экспрапрыяцыі. Будынак, які пасля Другой сусветнай вайны заставаўся ў прыватнай уласнасці сям'і Помер, перайшоў дзяржаве. Былая ўладальніца атрымала кампенсацыю ў памеры каля 810 тысяч еўра. Сама ж перабудова абыдзецца аўстрыйскаму бюджэту прыкладна ў 20 мільёнаў еўра.
Ад карчмы да бібліятэкі
Сам будынак, узведзены яшчэ ў XVII стагоддзі, першапачаткова быў звычайным жылым домам, а пазней ператварыўся ў карчму Gasthof zum Pommer. Сям'я будучага дыктатара здымала там кватэру на другім паверсе вельмі кароткі час у 1889 годзе, пасля чаго перабралася ў баварскі горад Пасау.
У часы Трэцяга рэйха нацысты актыўна выкарыстоўвалі «дом нараджэння фюрара» ў сваіх прапагандысцкіх мэтах. У пасляваенны час яго лёс складаўся інакш: з 1972 года Міністэрства ўнутраных спраў Аўстрыі арандавала памяшканні, дзе ў розныя гады размяшчаліся гарадская бібліятэка, школа і нават майстэрня для людзей з інваліднасцю.
Прымаючы рашэнне аб размяшчэнні паліцыі, аўстрыйскае МУС абапіралася на паспяховы вопыт суседняй Германіі. Баварыя вырашыла падобную праблему яшчэ ў сярэдзіне мінулага стагоддзя: у былой кватэры Гітлера на плошчы Прынцрэгентэнплац у Мюнхене з 1949 года спакойна базуюцца розныя падраздзяленні баварскай паліцыі.
Цяпер чытаюць
Коўл: Мы абмеркавалі магчымую паездку Лукашэнкі ў ЗША30
Каментары
Па-другое, усе праблемы з беларускай мовай, і гуглаўскія ў прыватнасці, звязаныя з тым, што большасць насельнітцтва Беларусі, і канкрэтна вы, топчаце родную мову на карысць расейчшыны. Пакуль вы будзеце рабіць так, датуль вы застанецеся ганебнымі халопамі маскоўцаў і іхніх гаўляйтэраў.