Дзе ў Мінску можна ўбачыць скульптуры коней — сімвалаў 2026 года

Батлейка

Аўтар самай тэатральнай шматфігурнай кампазіцыі сталіцы — мастак і скульптар Леанід Зільбер. Яе паставілі ў 1981 годзе ў Сэндайскім скверы за Музычным тэатрам.

Павялічыць

У цэнтры скульптуры — казак на кані, які выязджае са створак батлейкі. Побач знаходзяцца ўсмешлівы маленькі чорт, а таксама Антон з казой і Антоніха. Бронзавыя фігуркі ажываюць у думках. Здаецца, яшчэ імгненне — і каза вырвецца з рук, а казак на жвавым скакуне памчыцца далёка-далёка… 

Галава каня

У маляўнічым Lakeside Park аматары мастацтва могуць палюбавацца скульптурнымі кампазіцыямі вядомых беларускіх майстроў. Кожная з 17 канцэптуальных работ арыгінальная.

Павялічыць

Адных вабяць творы, што нагадваюць пра ўзаемасувязь з прыродай і родам («Каменны код», «Брама», «Малітва», «Слухаючы цішыню»), іншых — нешта больш смелае, што асацыюецца з сілай духу («Праз праліў Басфор», «Трансфармацыя» і «Вялікая галава каня»). 

Экіпаж губернатара Захарыя Карнеева

Скульптура знаходзіцца ў Верхнім горадзе.

Павялічыць

У бронзавую карэту-двойку аўтарства Уладзіміра Жбанава сядаюць і жанчыны «сярэбранага» ўзросту, і дзеці. Апошнія не супраць асядлаць жвавых скакуноў, жадаючы адчуць сябе сапраўднымі вершнікамі.

Конь і верабей

Бронзавы скульптурны твор Уладзіміра Жбанава на плошчы каля Камароўскага рынку — не жвавы скакун, які імкнецца ўвысь, а спакойны конік, што не хоча пакідаць гэта месца.

Павялічыць

Аднак некалькі гадоў таму слаўнай жывёліне і вераб’ю, які сядзіць на яе спіне, прыйшлося ненадоўга пакінуць родныя пенаты. Кампазіцыю разам з «Дамай з сабачкам» і «Фатографам» на некалькі тыдняў дэмантавалі для рэстаўрацыйных работ.

Дарэчы, у коніка Жбанава быў рэальны прататып — чэмпіёнка з Ратамкі па мянушцы Экспертыза. А птушка, якая сядзіць на ёй, ператварылася ў вераб’я-вершніка, які выконвае жаданні.

Гімнастка на кані

Каля будынка Белдзяржцырка пасля завяршэння яго маштабнай рэканструкцыі ў 2010 годзе размясцілі скульптурны ансамбль аўтарства Сяргея Бандарэнкі: «Гімнастка на кані», «Кот, чарапаха і слон-жанглёр», «Клоўн і певень з парасём», «Клоўны-музыкі».

Павялічыць

У герояў няма прататыпаў, і гэта не ілюстрацыі рэальных нумароў. Аднак на эмблеме цырка выяўленая вершніца на кані, і такі сюжэт скульптар абыграў у цэнтральнай кампазіцыі.

Сяргей Бандарэнка расказваў, што працуючы над творам, ён прыязджаў на стайню, размяшчаў станок у загоне для выгулу і ляпіў з натуры. Бо важна зафіксаваць характэрныя рухі скакуна.

Грабар

Яшчэ аднаго коніка можна ўбачыць у скверы «70 гадоў МТЗ». Побач з вернай памочніцай знаходзіцца грабар з рыдлёўкай.

Павялічыць

Так спрадвеку называлі наёмнага работніка. Грабары капалі сажалкі, вывозілі лішнія пясок, гліну, камяні. Пры будаўніцтве Мінскага трактарнага завода землякопы з коньмі перамясцілі нямала грунту і будматэрыялаў.

Гэта кампазіцыя, якую стварылі Віктар і Максім Палешчукі разам з Ігарам Тапчылкам, — даніна памяці тым, чыя праца стала падмуркам завода.

Помнік Аляксандру Неўскаму

У лістападзе 2023‑га ў скверы каля скрыжавання вуліцы Новавіленскай і Старавіленскага тракта, побач з расійскай амбасадай, паставілі помнік Аляксандру Неўскаму.

Павялічыць

Князь з харугвай у правай руцэ сядзіць на кані. Маштабы манумента ўражваюць: вышыня — 11 метраў, вага — каля 4 тон.

Па перыметры пастамента адлітыя тры барэльефы з выявамі падзей з жыцця Аляксандра Неўскага: блаславенне на шлюб з полацкай князёўнай Аляксандрай Брачыславаўнай, эпізод з Неўскай бітвы, сцэна прыёму паслоў з прапановай прыняць каталіцкую веру.

• 0
• 0
• 0
• 0
• 0
• 0
• 0
• 0