Стартап з беларускімі каранямі заключыў здзелку з Microsoft на 750 мільёнаў даляраў
Perplexity атрымае доступ да воблачнай інфраструктуры Azure.
Стартап Perplexity, які заснаваў беларус Дзяніс Ярац разам з двума партнёрамі ў ЗША, падпісаў пагадненне з Microsoft на суму 750 млн даляраў, піша Office Life.
Паводле пагаднення, Perplexity атрымае доступ да воблачнай інфраструктуры Azure. Такім чынам стартап пашырае свой бізнэс за межы даўняга воблачнага партнёра Amazon.com Inc.
Кантракт падпісаны на тры гады. Стартап, заснаваны беларусам, зможа запускаць розныя мадэлі штучнага інтэлекту праз праграму Microsoft Foundry, у тым ліку рашэнні ад OpenAI, Anthropic і xAI.
Каментуючы здзелку, у Perplexity заявілі, што партнёрства з Microsoft дапаможа атрымаць доступ да перадавых мадэляў. Прадстаўнікі Microsoft здзелку не каментуюць.
У снежні стала вядома, што вядомы партугальскі футбаліст Крышціяну Раналду інвеставаў у пошукавы сэрвіс з выкарыстаннем штучнага інтэлекту Perplexity AI.
Таксама ў снежні газета The New York Times паведаміла, што падала пазоў у суд Нью-Ёрка супраць стартапу Perplexity. Раней Reddit падала пазоў супраць стартапу і трох сэрвісаў збору даных. А летам брытанская тэлерадыёкампанія BBC накіравала Perplexity ліст з патрабаваннем спыніць збор кантэнту з яе сайтаў. У адваротным выпадку кампаніі пагражалі судом. Раней Forbes і Wired таксама абвінавачвалі стартап у крадзяжы кантэнту.
Каментары