Еўропу паралізавала снегам, а на Беларусь насоўваецца магутны цыклон «Улі». Чакаюцца гурбы да 40 см і маразы да -25

Што адбываецца ў Еўропе?

Анамальныя халады і снегапады накрылі нават тыя рэгіёны, дзе зімы звычайна мяккія.

У італьянскім курортным Рыміні мясцовыя жыхары назіраюць сюррэалістычную карціну — пальмы пад снегам.

На іспанскай Маёрцы і іншых Балеарскіх астравах абвешчаны «жоўты» ўзровень небяспекі.

Павялічыць

Павялічыць

Але больш за ўсё пацярпела Цэнтральная і Заходняя Еўропа. У Францыі ў 38 дэпартаментах уведзены высокі ўзровень пагрозы. Парыжскія аэрапорты Арлі і Шарль дэ Голь былі вымушаныя скасаваць сотні рэйсаў праз абледзяненне палос. На дарогах краіны ўтварыліся заторы агульнай даўжынёй да 1000 км (каля Парыжа — да 600 км). На жаль, не абышлося без ахвяр: у ДТЗ, звязаных з непагаддзю, загінулі мінімум пяць чалавек.

У Нідэрландах чыгуначнае злучэнне часткова паралізаванае — гэта самы працяглы снегапад за апошнія 4 гады. Аэрапорт Схіпхол (Амстэрдам) скасаваў больш за 700 рэйсаў, людзі вымушаныя начаваць проста ў тэрміналах. У Вялікабрытаніі закрытыя сотні школ, парушаныя злучэнні цягнікоў Eurostar.

Што ўжо прыйшло ў Беларусь?

Беларусь пакуль знаходзіцца ў фазе «размінкі». 6 і 7 студзеня паўднёвы цыклон прынёс снег пераважна на поўдзень і ў цэнтр краіны.

На раніцу 7 студзеня самыя высокія гурбы зафіксаваныя ў Нарачы і Плешчаніцах — 28 см. У Мінску вышыня снежнага покрыва дасягнула 21 см. Аднак галоўнае выпрабаванне яшчэ наперадзе.

«Улі» ідзе па слядах «Хаўера»

Сіноптыкі пільна сочаць за новым актыўным паўднёвым цыклонам, які сфармаваўся над поўднем Італіі. Нямецкія метэаролагі назвалі яго «Улі» (Ulli), а італьянскія — «Фрэнсіс».

Яго небяспека ў тым, што ён утварыўся на стыку вельмі кантрасных мас: у тыл яму дзьме арктычны холад, а насычаецца ён вільгаццю Міжземнамор'я. Такая камбінацыя спараджае вельмі магутныя віхуры — менавіта такім быў легендарны цыклон «Хаўер».

Чакаецца, што «Улі» дасягне межаў Беларусі ўвечары 8 студзеня.

Павялічыць

Чаго чакаць 8‑9 студзеня?

Прагнозы для Беларусі пагоршыліся. Траекторыя цыклона пройдзе бліжэй да нашых межаў, чым меркавалася раней.

• Моцныя снегапады: 8 і 9 студзеня зона непагадзі накрые не толькі поўдзень і паўднёвы ўсход, але і цэнтр краіны.

• Рэкордныя ападкі: За суткі на поўдні можа выпасці да 30 мм ападкаў, а сумарна — да 45 мм. Гэта амаль паўтары месячныя нормы снегу за пару дзён.

• Прырост сумётаў: На поўдні і паўднёвым усходзе (Гомельская, Брэсцкая вобласці) снегу дадасца на 20‑30 см, у цэнтры — на 10‑15 см. Месцамі вышыня гурбаў можа перавысіць 40 см.

• Вецер і заносы: Чакаецца парывісты вецер 15‑22 м/с, моцныя завеі і снежныя заносы на дарогах.

• Абліваха: На паўднёвым усходзе Гомельскай вобласці магчымы галалёд.

У Мінску пік непагадзі чакаецца ўноч на 9 студзеня і раніцай: моцны снег, мяцеліца, вецер да 18 м/с.

Беларускія сіноптыкі пацвердзілі небяспеку: паводле ўдакладненых звестак Белгідрамета, 8‑9 студзеня парывы ветру могуць дасягаць 24 м/с (больш, чым прагназавалася раней).

У сувязі са складанымі ўмовамі ратавальнікі настойліва рэкамендуюць беларусам па магчымасці адмовіцца ад паездак і заставацца ў бяспечным месцы.

Пасля снегу — суровыя маразы

Снегапад зменіцца рэзкім пахаладаннем. Паводле прагнозаў мадэлі ECMWF, у Еўропе ўсталюецца блакіруючы антыцыклон, які перакрые доступ цёпламу паветру з Атлантыкі. Гэта прынясе сапраўдную кантынентальную зіму.

Пачынаючы з другой паловы тыдня, тэмпература пачне падаць. У перспектыве да 20‑х чысел студзеня ў Беларусі ўначы слупкі тэрмометраў могуць апусціцца да -20..-25°C.

• 8
• 0
• 3
• 8
• 16
• 3
• 0
• 0