Дзяўчына купіла беларускі камамбер, а ён на талерцы расцёкся. Вытворца адказаў
Беларускі вытворца сыру «Berger» пракаментаваў шум вакол незвычайнай кансістэнцыі камамбера.
Карыстальніца тыктоку паскардзілася на занадта вадкае змесціва сыру. Сыр выглядае не вельмі звычайна.
Аднак спецыялісты Вілейскага вытворчага ўчастка ААТ «Мінскі малочны завод №1» запэўнілі, што такая тэкстура з’яўляецца прыкметай ідэальна паспелага прадукту, а не тэхнічным бракам.
Паводле тлумачэнняў тэхнолагаў, камамбер — гэта «жывы» сыр, які працягвае змяняцца нават пасля запакоўкі. Пад уздзеяннем ферментаў белай цвілі яго структура паступова размякчаецца, становіцца цякучай, а смак набывае асаблівую інтэнсіўнасць.
Спецыялісты адзначаюць, што на 30‑45 суткі пасля вытворчасці скарынка ў спалучэнні з вязкай, амаль вадкай сярэдзінай лічыцца эталонам якасці для аматараў гэтага гатунку.
Тым жа, хто аддае перавагу больш цвёрдаму сыру, вытворца параіў выбіраць прадукт з больш раннім тэрмінам прыдатнасці.
Каментары