Мусульманскія банды ўзялі пад кантроль брытанскую турму, поўную наркотыкаў
Вытворчасць зброі проста ў камерах, пастаўкі наркотыкаў дронамі і тэрор у дачыненні да персаналу ды іншых зняволеных — такое дапусцілі ў турме для пажыццёвых асуджаных у графстве Кент.
Галоўны турэмны інспектар Вялікабрытаніі Чарлі Тэйлар прыняў пастанову ўвесці спецыяльны рэжым нагляду ў турме Суэйлсайд (HMP Swaleside) у графстве Кент. Як піша The Telegraph, гэта вымушаная мера стала адказам на катастрафічную сітуацыю з бяспекай ва ўстанове. Паводле ацэнкі чыноўніка, турма стала небяспечнай, бруднай і перапоўненай наркотыкамі, а сярод зняволеных пануе татальнае пачуццё адчаю.
Узровень гвалту дасягнуў крытычнага пункту: шэсць новых зняволеных былі збітыя або атрымалі нажавыя раненні ў першую ж ноч знаходжання ў камеры.
Тэйлар назваў паказчыкі гэтай турмы найгоршымі ад усіх, што ён бачыў за пяць гадоў сваёй працы на пасадзе галоўнага інспектара. Гэта вымусіла міністра юстыцыі Дэвіда Лэмі тэрмінова распрацоўваць план экстранных дзеянняў.
Турма для цяжкіх злачынцаў
Суэйлсайд — гэта мужчынская турма, прызначаная для сур'ёзных злачынцаў. Больш за палову мясцовых вязняў прысуджаныя да пажыццёвага пакарання — гэта асноўны цэнтр, дзе яны адбываюць першы этап свайго тэрміну. Кантынгент тут вельмі стракаты: ад 30 да 40% складаюць прадстаўнікі этнічных меншасцей і замежныя грамадзяне.
Фармальна тут існуюць праграмы рэабілітацыі: адукацыйныя курсы ад Кентэрберыйскага каледжа, інжынерна-тэхнічныя работы, камерцыйныя вытворчыя майстэрні, а таксама заняткі садаводствам і сельскай гаспадаркай.
Праблемы з бяспекай пераследуюць установу гадамі. Яшчэ ў снежні 2016 года тут успыхнуў бунт, калі зняволеныя на некаторы час цалкам захапілі адно крыло будынка.
Дыктат рэлігійных банд
Аднак з гадамі сітуацыя не палепшылася. Мясцовыя назіральнікі ў сваёй справаздачы канстатуюць, што рэальная ўлада ўнутры сцен належыць бандам, сфармаваным пераважна паводле рэлігійнай прыкметы (амаль траціна зняволеных тут — мусульмане). Многія іншыя вязні прызнаюцца, што адчуваюць сябе абсалютна бездапаможнымі і неабароненымі перад агрэсіяй гэтых груповак.
Сітуацыя ўскладняецца пастаяннай вайной паміж канкурэнтнымі кланамі за кантроль над тэрыторыяй і плынямі наркотыкаў. Акрамя фізічнага гвалту, у турме квітнеюць расізм і дыскрымінацыя, адзначаюцца выпадкі агрэсіі ў дачыненні да зняволеных габрэйскага паходжання. Узровень страху настолькі высокі, што многія вязні баяцца наведваць спартзалу або хадзіць на прыём да доктара, асцерагаючыся нападу.
Тэхнічнае абсталяванне злачынцаў таксама ўражвае. Назіральнікі паведамляюць пра наладжванне вытворчасці халоднай зброі непасрэдна на тэрыторыі турмы, што яны называюць злавесным знакам.
Адначасова з гэтым паветраная прастора над турмой фактычна адкрыта для крыміналу: дроны рэгулярна скідваюць кантрабанду, уключаючы нажы і наркотыкі (асабліва сінтэтычныя сумесі, такія як «спайс»). Траціна апытаных зняволеных заявіла, што зазнавала напады, а тры чвэрці прызналіся, што не адчуваюць сябе ў бяспецы.
Кадравы калапс
Крызіс пагаршаецца вострай нястачай дасведчаных супрацоўнікаў. За тры месяцы было зафіксавана больш за сотню нападаў на персанал турмы. Большая частка канфліктаў пачыналася пасля таго, як наглядчыкі спрабавалі даць зняволеным распараджэнне. У адказ у палову выпадкаў супрацоўнікаў аплёўвалі альбо білі кулакамі.
Каранём праблемы назіральнікі лічаць крытычную нявопытнасць кадраў. Амаль палова персаналу працуе ў сістэме менш за год. Чаканне, што навічкі змогуць справіцца з жорсткім кантынгентам без падтрымкі дасведчаных калег, назіральнікі называюць цалкам нерэалістычным.
Бытавыя ўмовы таксама апісваюцца як жахлівыя: усюды графіці, сляды пажараў, зламаная мэбля і цвіль у душавых кабінках. Спробы адміністрацыі навесці парадак часта зводзяцца да жорсткіх абмежаванняў, якія інспектары назвалі негуманнымі: паводле новага рэжыму, амаль палова зняволеных можа пакідаць свае камеры толькі на 30 хвілін за дзень.
Урад прызнае праблему. Міністр у справах турмаў назваў справаздачу глыбока трывожнай і выказаў расчараванне тым, што ўстанова не адпавядае стандартам. Чыноўнік адзначыў, што ўладам дасталася ў спадчыну разбураная турэмная сістэма, дзе занадта многа турмаў, падобных да Суэйлсайда, якія спрыяюць злачыннасці замест выпраўлення.
У якасці выйсця ўлады абяцаюць пабудаваць 14 тысяч новых месцаў для зняволеных і правесці маштабную рэформу сістэмы вынясення прысудаў, каб скараціць колькасць рэцыдываў і арганізаваць бяспеку насельніцтва.
Каментары