Змагаючыся з перапаўненнем турмаў, у Брытаніі вырашылі выпускаць зняволеных, што адбывалі траціну тэрміну
Брытанскі ўрад прапанаваў турэмную рэформу, якая дазволіць большасці зняволеных у Англіі і Уэльсе вызваляцца з турмаў умоўна-датэрмінова пасля адбыцця ўсяго траціны прызначанага тэрміну, піша Бі-бі-сі.
Большасць брытанскіх зняволеных выходзяць з турмаў пасля адбыцця паловы тэрміну.
Аднак летась, сутыкнуўшыся з перспектывай хуткага перапаўнення турмаў, лейбарысцкі ўрад вырашыў выпускаць злачынцаў, асуджаных на тэрміны больш за пяць гадоў, ужо пасля адбыцця 40% тэрміну. У перыяд з верасня па снежань, калі дзейнічалі гэтыя надзвычайныя меры, паводле дадзеных урада, было выпушчана больш за 16 тысяч асуджаных.
У чацвер, выступаючы ў Палаце абшчын, міністр юстыцыі Шабана Махмуд падкрэсліла, што рэформа не закране асуджаных за асабліва цяжкія гвалтоўныя злачынствы. Ім, як і раней, давядзецца адбыць як мінімум дзве траціны свайго тэрміну. Тое ж датычыцца і асуджаных за тэрарызм.
Ценявы міністр юстыцыі Роберт Джэнрык назваў планы лейбарыстаў «лёгкім спосабам выхаду з турмы для небяспечных злачынцаў». На гэта Махмуд адказала, што ўрады кансерватараў, членам якіх быў і Джэнрык, за 14 гадоў пры ўладзе пашырылі ўмяшчальнасць турмаў не больш як на 500 месцаў.
На мінулым тыдні ўрад ацэньваў умяшчальнасць турмаў у 89 442 месцы. Амаль усе месцы тады былі занятыя: у турмах знаходзілася 88 087 чалавек.
Лейбарысцкі ўрад заяўляе, што з ліпеня мінулага года, калі ён прыйшоў да ўлады, ён ужо стварыў 2400 дадатковых месцаў у турмах (так, у красавіку пачала працаваць новая турма недалёка ад Ёрка на 1500 месцаў). Да 2031 года плануецца пабудаваць яшчэ тры турмы і такім чынам павялічыць умяшчальнасць на 14 тысяч месцаў.
Аднак Махмуд прызнала ў парламенце, што турэмнае насельніцтва ў апошнія гады расла на «3000 чалавек у год», таму праблема адсутнасці месцаў узнікае пастаянна.
Таксама міністр пацвердзіла пашырэнне яшчэ на 20 англійскіх турмаў невялікай эксперыментальнай схемы, што прапануе некаторым асуджаным за злачынствы супраць палавой недатыкальнасці магчымасць добраахвотнай хімічнай кастрацыі.
Паводле слоў Махмуд, урад вывучыць магчымасць зрабіць хімічную кастрацыю для такіх асуджаных не добраахвотнай, а абавязковай.
У Мінску адбыліся масавыя затрыманні выдаўцоў і кнігараспаўсюднікаў33
Каментары