У Гродне выставілі на продаж шалёна дарагія кватэры — разабралі за гадзіну
У новым квартале побач з гістарычным цэнтрам Гродна стартавалі продажы кватэр у 10‑павярховай панэльцы. Цана за метр рэкордная.
Новы дом будзе месціцца па адрасе: вул. Астроўскага, 2В. Цэны на квадрат у гэтай панэльцы пачынаюцца з 3 750 рублёў ($1270) у трохпакаёўках на 90 квадратаў. Гэта 337 500 рублёў, ці 114 400 даляраў за кватэру.
Квадрат у двухпакаёўках на 85 метраў прадаецца па 3 900 рублёў ($1322). Гэта 331 500 рублёў, ці каля 112 400 даляраў за двухпакаёўку.
Метр у аднапакаёўках ацанілі на 4 500 рублёў ($1525). За кватэру плошчай пад 50 квадратаў выходзіць 225 тысяч рублёў, ці каля 76 270 даляраў.
Гэта самы дарагі квадрат у дамах, якія ўзводзіць «Гроднажылбуд». Пры гэтым некаторыя людзі, якія хацелі набыць там жытло кажуць, што не паспелі гэта зрабіць, бо кватэры ў гэтым доме раскупілі літаральна за гадзіну.
Для параўнання: у аддаленым ад цэнтра спальным раёне Грандзічы-4 «Гроднажылбуд» прадае кватэры ў панэльках па цэнах ад 2070 да 2550 рублёў (каля 700—865 даляраў).
Высокі кошт кватэр у гэтым квартале тлумачыцца выдатным размяшчэннем. Гэта, бадай, апошні пляц побач з цэнтрам, дзе можна пабудаваць квартал з шматпавярховікамі. Праўда, нягледзячы на блізкасць да цэнтру і высокі кошт метра, гэта пераважна звычайныя панэлькі, якія ў многіх гараджан выклікаюць не самыя пазітыўныя эмоцыі.
Адметна, што яшчэ летам у гэтым жа квартале кватэры каштавалі значна танней. Так, квадрат у доме, які тады будаваўся, прадавалі па 2900—3200 рублёў (каля 990—1100 даляраў).
Як мы пісалі раней, Гродна сёлета стаў лідарам сярод буйных гарадоў Беларусі па росце цэн на нерухомасць.
Цяпер чытаюць
«Мама, давай напішам заяву ў міліцыю, ён мяне ўжо дастаў». Маці школьніка з Брэста, які скончыў жыццё самагубствам, расказала пра цкаванне сына16
Каментары