«Яны што, верталёт прэзідэнта саб’юць?!» Лукашэнка пра намер Еўропы збіваць расійскія самалёты над сваёй тэрыторыяй
«Я часта ў Белавежскую пушчу лятаю, гэта зусім на мяжы з Польшчай».
Еўропа папярэдзіла Расію, што будзе збіваць яе самалёты над сваёй тэрыторыяй. Аляксандра Лукашэнку расійскія журналісты ў Маскве спыталі, што ён думае на гэты конт.
«Ведаеце, плявузгаць можна і ў публічную прастору любыя афёры запускаць. А калі дойдзе да справы, вось вы потым убачыце, што яны саб'юць і як. Што, яны саб'юць на нашай тэрыторыі лятальныя апараты, самалёты, верталёты і гэтак далей? Ну, дапусцім, Белавежскую пушчу… я туды часта лятаю, гэта зусім на мяжы з Польшчай. Верталёт прэзідэнта саб'юць ці там нейкі вайсковы верталёт суправаджэння? Дык адказ жа прыляціць імгненна. Гэта ж не вайна ва Украіне», — адказаў Лукашэнка, перакруціўшы, нібыта НАТА збіраецца наносіць удары па самалётах у паветранай прасторы Беларусі ці Расіі.
Ён назваў заяву краін Ёўропы збіваць расійскія самалёты над сваёй тэрыторыяй «смелай заявай».
«Тое, што яны заявілі, будуць збіваць… Ну, няхай паспрабуюць саб'юць. Або над Калінінградам там саб'юць нешта расійскае. Ну нам давядзецца, не дай бог, вядома, тады ваяваць на ўсе грошы, як у Расіі кажуць, на ўсе грошы. Гэта трэба? Не. Таму, думаю, супакояцца», — мяркуе ён.
Ён нагадаў, што беларускі бок папярэдзіў польскі пра залёт расійскіх беспілотнікаў.
«Мы ім паведамілі: «Хлопцы, глядзіце». А калі б не паведамілі? Іх нават гэта здзівіла, што мы ім паведамілі. Дык яны што, за гэта будуць нашы самалёты-верталёты збіваць ці расійскія? Ну, гэта я лічу, непрадуманая такая заява, дурная заява. Так дзейнічаць нельга, суседзі так не працуюць», — сказаў ён.
Цяпер чытаюць
«У Віцебску заходзіў у тралейбус і казаў «Слава Украіне!». Украінца ў 67 гадоў пасадзілі за каменты, напісаныя пасля гібелі хроснай дачкі пад абстрэлам у Кіеве4
Каментары