Аўстралія заплаціць суседняму атолу $1,5 мільярда за стварэнне калоніі для дэпартаваных мігрантаў-злачынцаў
Малюсенькая ціхаакіянская дзяржава Науру павінна стаць афшорнай калоніяй для сотняў злачынцаў замежнага паходжання, дэпартаваных з Аўстраліі. Крытыкі ўжо назвалі здзелку спробай ператварыць востраў у сметнік.
Аўстралія заключыла сакрэтную здзелку на $1,5 мільярда, каб дэпартаваць сотні злачынцаў замежнага паходжання на малюсенькі ціхаакіянскі востраў Науру. Аб гэтым піша The Telegraph.
Невялікая астраўная дзяржава стане для Аўстраліі афшорнай папраўчай калоніяй для сур'ёзных злачынцаў, у тым ліку забойцаў, педафілаў і рабаўнікоў.
Крытыкі сцвярджаюць, што гэтая дамова ператворыць востраў плошчай усяго 21 квадратны кіламетр у «сметнік» і нагадвае практыку Брытаніі, якая выкарыстоўвала Аўстралію для вырашэння праблемы перапоўненых турмаў у XVIII і XIX стагоддзях.
Як паведамляецца, пагадненне было падпісана 29 жніўня. Яно прадугледжвае, што Аўстралія будзе плаціць Науру — трэцяй самай маленькай краіне ў свеце (пасля Ватыкана і Манака) — на працягу трох дзесяцігоддзяў за размяшчэнне дэпартаваных неграмадзян. Па словах аўстралійскіх чыноўнікаў, жыллё для першых дэпартаваных ужо падрыхтаванае.
Гэты крок з'яўляецца часткай адной з самых жорсткіх міграцыйных палітык у свеце, якую праводзіць Аўстралія. Краіна ўжо выкарыстоўвае востраў Науру для стрымлівання нелегальнай міграцыі: туды адпраўляюць шукальнікаў прытулку, якія прыбываюць на лодках, для разгляду іхніх спраў. Гэтая практыка дазволіла рэзка скараціць колькасць такіх прыбыццяў.
Аднак нядаўна ўрад сутыкнуўся з новай юрыдычнай праблемай, якая не тычыцца ўцекачоў. У 2023 годзе Вярхоўны суд Аўстраліі пастанавіў, што ўлады больш не могуць бясконца ўтрымліваць у іміграцыйных цэнтрах злачынцаў замежнага паходжання пасля таго, як яны адбылі свой турэмны тэрмін. Гэта тычылася асоб без грамадзянства і тых, чые краіны адмаўляліся прымаць іх назад.
Згодна з новай дамовай, Нуару стане прытулкам для людзей, якім было адмоўлена ў візе праз судзімасць і якіх немагчыма дэпартаваць з Аўстраліі.
Аўстралія заплаціць Науру 250 мільёнаў даляраў авансам для стварэння мэтавага фонду, а таксама будзе пералічваць па 44 мільёны даляраў штогод на працягу 30 гадоў.
Апаненты раскрытыкавалі гэты крок, заявіўшы, што Аўстралія зноў перакладае свае праблемы на Науру, насельніцтва якога складае ўсяго 12 000 чалавек. Сенатар ад партыі «Зялёных» Дэвід Шубрыдж адзначыў, што ўрад «ставіцца да Науру як да сметніка», нагадаўшы, што «Науру — гэта малюсенькі востраў з эканомікай, якая амаль адсутнічае»
Самі жыхары вострава таксама ставяцца да навіны скептычна. Адны лічаць гэта «лёгкім спосабам зарабіць», іншыя ж адзначаюць, што сотні мільёнаў даляраў, якія Аўстралія ўжо заплаціла Науру за ўтрыманне шукальнікаў прытулку, не прывялі да росквіту на востраве.
Калісьці Науру, якая атрымала незалежнасць ад Аўстраліі ў 1968 годзе, лічылася самай багатай краінай у свеце дзякуючы здабычы фасфатаў, але праз дрэннае кіраванне яе эканоміка прыйшла ў заняпад, і цяпер кожны чацвёрты жыхар жыве за рысай беднасці.
Паведамляецца, што раней Аўстралія спрабавала адправіць мігрантаў на востраў Манус у Папуа-Новай Гвінеі, але здзелка сарвалася.
Цяпер чытаюць
Лукашэнка: Раман Пратасевіч — даўні супрацоўнік беларускай разведкі53
Каментары