Улады запэўніваюць, што паўторнага апоўзня ў віцебскім Вярхоўі не будзе
Улады Віцебскай вобласці запэўніваюць, што паўторнага размыву глебы ў мікрараёне Вярхоўе не будзе. Пра гэта заявіў аблвыканкам увечары 26 ліпеня.
Паводле інфармацыі прэс-службы аблвыканкама, спецыялісты не выявілі пагрозы новага абвальвання глебы на месцы правядзення работ. Таксама паведамляецца, што ніхто з жыхароў не пацярпеў.
Для ліквідацыі наступстваў ранішняга размыву задзейнічаныя 23 адзінкі тэхнікі і 60 супрацоўнікаў розных службаў.
Аблвыканкам таксама адзначыў, што на гарачую лінію зваротаў ад грамадзян не паступала.
Раніцай 26 ліпеня Міністэрства па надзвычайных сітуацыях паведаміла пра абрынанне сямі гаспадарчых пабудоў на віцебскай вуліцы Садовай у мікрараёне Вярхоўе — гэта частка Чыгуначнага раёна Віцебска, якая аддзеленая ад асноўнай часткі горада тэрыторыяй Віцебскага раёна і знаходзіцца на беразе Заходняй Дзвіны.
Размыла таксама тэхнічны праезд памерам 4×70 м, глеба спаўзла ў бок ракі на плошчы каля 100×100 метраў.
Пазней МНС паведаміла, што на месцы працуюць аварыйныя службы, ідзе ўмацаванне берагавой лініі. У сваю чаргу, начальнік абласнога ўпраўлення МНС Сяргей Мялешкін заявіў, што створаныя спецыяльныя працоўныя групы для вывучэння наступстваў.
Ён дадаў, што ўжо адбылася сустрэча з мясцовымі жыхарамі, і цяпер ідзе абыход дамоў. Для працы з насельніцтвам сфарміраваныя групы з прадстаўнікоў улады, МНС і праваахоўнікаў. Акрамя таго, чыноўнікі вывучаюць сітуацыю на дзвюх падтопленых вуліцах, правяраюць меліярацыйныя сістэмы і ліўнёўкі. Арганізавалі дадатковыя каналы для адводу вады і аднавілі электразабеспячэнне.
Цяпер чытаюць
Жанчыну-пульманолага з 30-гадовым стажам адправілі ў калонію па трох палітычных артыкулах2
Каментары