«Сёння мы жывем у культурным грамадстве». Чаму гаспадар незвычайнай крамы самаабслугоўвання на Палессі не баіцца крадзяжоў
У вёсцы Ракітна Лунінецкага раёна працуе незвычайная крама самаабслугоўвання, якую нядаўна праславілі тыктокеры. Людзі тут самі выбіраюць гародніну, пакідаюць грошы, а калі трэба, то і бяруць рэшту — без камер, касіраў і аховы. Галоўнае тут — давер. І, што дзіўна, ніхто нічога не крадзе, а купцы пакідаюць толькі добрыя водгукі. Sb.by з'ездзіла ў гэту вёску і даведалася, каму да галавы прыйшла такая ідэя.
Арганізавалі гэты гандлёвы пункт мясцовы жыхар Юрый Караваевіч і ягоная жонка. Яны больш за 20 гадоў вырошчваюць гародніну. Раней збывалі прадукцыю ў аб'екты грамадскага харчавання, але калі попыт скараціўся, пачалі прадаваць лішкі ўсім ахвотным.
Людзі часта заходзілі дадому, перашкаджалі працаваць — таму хтосьці з купцоў прапанаваў: «Пакідайце гародніну на лаўцы, мы самі возьмем і пакінем грошы». Пазней Юрый пабудаваў просты крыты ларок з вагамі і скрыняй для аплаты.
У краме пануюць простыя правілы: выбраў, ўзважыў, пакінуў грошы — або перавёў на рахунак, калі без наяўных. Цэны вельмі даступныя: памідоры — па 5,5 рубля за кілаграм, агуркі — па 3, бульба — 1,7. А на сценах — наклейкі з добрымі словамі: «Дзякуй за давер!», «Прывітанне з Калінінграда!», «Найсмачнейшыя памідоры!»
Юрый кажа, што не баіцца крадзяжоў:
«У гэтай крамцы ўсё заснавана на даверы да людзей. Гэта ў 90-я было страшна ровар пакінуць без нагляду ‑— хтосьці б яго сабе хутка «прыватызаваў». А сёння мы жывем у культурным грамадстве, дзе ўсе паважаюць адзін аднаго. У нашай вёсцы хоць што пакінь на бачным месцы — нікому чужога не трэба».
Мясцовыя жыхары падтрымліваюць ініцыятыву, а іх сваякі з-за мяжы здзіўляюцца, што такая крама працуе без кантролю.
Пенсіянерка з суседняга дома, Вольга Грышко, кажа, што сюды прыязджалі людзі з Жодзіна, Калінінграда і Санкт-Пецярбурга. У выхадныя тут поўна людзей, а ў Юры, маўляў, гародніна нават смачнейшая, чым з уласнага агарода.
«Гэта трэба настолькі давяраць людзям». У вёсцы на Брэстчыне адкрылі ларок самаабслугоўвання без прадаўца
У палескай вёсцы прадаюць гародніну напавер, без прадаўца ВІДЭА
«Ягадаў меней, а цэны большыя». Што робіцца на галоўным рынку клубніцаў
Людзі здзіўляюцца таму, што ў вёсках на Браслаўшчыне няма платоў. Чым гэта можна патлумачыць?
Цяпер чытаюць
«Калаўра мы не пакрыўдзілі»: стала вядома пра новае месца працы былога старшыні Нацбанка3
Каментары