Мясаедская дыета — у якіх выпадках яна дапамагае

Дыету, якая прадугледжвае ўжыванне толькі мяса, называюць карнівор-дыетай. Яна не з’яўляецца нейкім вынаходніцтвам, бо існуе ў прыродзе: так харчуюцца драпежнікі — напрыклад, ваўкі, львы ці арлы. Аднак у выпадку з чалавекам гэта ўжо не прыродная неабходнасць, а свядомы выбар.

Як піша FitBook.de, цікаўнасць да нізкавугляводнага спосабу харчавання існуе даўно. Так, у 1797 годзе шатландскі вайсковы хірург Джон Рола паведаміў пра паспяховае лячэнне пацыента з дыябетам другога тыпу, які быў пераведзены на мясную дыету.

Сучасную папулярнасць гэтаму тыпу харчавання прынёс амерыканец Шон Бэйкер — доктар і бодзібілдар, які ў 2019 годзе выдаў кнігу The Carnivore Diet. У ёй ён прапагандуе поўную адмову ад вугляводаў і расліннай ежы на карысць выключна жывёльных прадуктаў.

Прыхільнікі карнівор-дыеты лічаць яе найбольш натуральнай і здаровай для чалавека. Яны нагадваюць, што мясаедства было ўласцівае нашым продкам, якія жылі і харчаваліся падобна да дзікіх драпежнікаў.

Згодна з іх поглядам, калі выключыць з рацыёну вугляводы і спажываць шмат бялку ў выглядзе вялікіх порцый мяса, удасца не толькі паспяхова пахудзець, але і нарасціць больш мышачнай масы і павысіць узровень тэстастэрону.

Мясаеды таксама сцвярджаюць, што іх дыета зніжае рызыку хранічных захворванняў, звязаных з харчаваннем, такіх як запаленне, дыябет або гіпертанія, паляпшае настрой і дапамагае захаваць яснасць мыслення і канцэнтрацыю.

Нягледзячы на ўсіх крытыкаў, прыхільнікі карнівор-дыеты сцвярджаюць: калі арганізм адмовіцца ад вугляводаў, ён можа атрымаць усе неабходныя пажыўныя рэчывы з мяса.

Прынцып мясаедскай дыеты

Карнівор-дыета — гэта па сутнасці «хардкорны» варыянт кетагеннай дыеты, у якім поўнасцю выключаюцца вугляводы. Трэба ёсць толькі мяса, рыбу, яйкі і некаторыя прадукты жывёльнага паходжання, выключаючы пры гэтым усе іншыя групы прадуктаў, у тым ліку гародніну, садавіну, злакі, грыбы, бабовыя, арэхі і насенне.

З малочнымі прадуктамі не ўсё так адназначна. Яны забароненыя, калі ўтрымліваюць лактозу. Гэта значыць, што малако нельга, а, напрыклад, безлактозны спелы сыр можна.

З напояў мясаеды аддаюць перавагу вадзе, хоць многія ўключаюць гарбату і каву ў свой рацыён.

Мэта дыеты — увесці арганізм у стан кетозу, калі асноўным крыніцай энергіі становяцца кетонавыя целы, якія ўтвараюцца пры расшчапленні тлушчу, а не глюкоза. Гэта павінна спрыяць пахудзенню.

Павялічыць

Калі ў канкрэтным прыёме ежы няма мяса ці рыбы, варта выкарыстоўваць іншыя жывёльныя прадукты, напрыклад, яйкі або малочныя прадукты без лактозы.

У больш мяккіх варыянтах дыеты дазваляюцца зялёная гародніна, авакада, арэхі, раслінны алей, але толькі ў вельмі абмежаванай колькасці.

Ці збалансаваная дыета мясаеда?

Адназначна не. Наўрад ці знойдзецца якая-небудзь іншая дыета, якая б так паслядоўна пазбягала традыцыйных рэкамендацый па харчаванні, як карнівор-дыета.

Базава дыетолагі рэкамендуюць, каб як мінімум 50 працэнтаў энергіі ў арганізм паступала з вугляводаў, каля 20 працэнтаў з бялку і 30 працэнтаў з тлушчу, строгія мясаеды спажываюць амаль нуль вугляводаў. Іх рацыён змяшчае празмерную колькасць бялку і тлушчу, але цалкам пазбаўлены клятчаткі, мікраэлементаў і антыаксідантаў, што звычайна паступаюць з расліннай ежы.

Перавагі мясаедства

Для аматараў мяса, якія гатовы ігнараваць некаторыя навуковыя факты пра харчаванне, часовы пераход на мясаедства можа дапамагчы пахудзець. За кошт пераходу абмену рэчываў у стан кетозу страта вагі адбываецца хутчэй.

Шэраг даследаванняў пацвярджае, што нізкавугляводныя дыеты эфектыўныя для пахудзення. Акрамя таго, вялікая колькасць бялку натуральным чынам прыгнятае пачуцце голаду. Акрамя таго, такая дыета не патрабуе падліку калорый, што робіць яе простай для штодзённага выкарыстання.

Некаторыя прыхільнікі таксама адзначаюць меншую рызыку алергіі, бо карнівор-дыета выключае раслінныя бялкі, якія часта выклікаюць непераноснасць. Аднак варта памятаць, што алергічныя рэакцыі могуць узнікаць і на жывёльныя прадукты, таму гэта не гарантыя поўнай бяспекі.

Небяспека мясаедства

Аднак нават зацятым аматарам мяса не варта прытрымлівацца строгіх варыянтаў гэтай дыеты і трымаць яе доўга, бо рацыён, які практычна выключае вугляводы — асноўную групу макраэлементаў, — непазбежна прыводзіць да рызык для здароўя.

Праблема не толькі ў адсутнасці клятчаткі, вітамінаў і мінералаў. Даследаванні не раз дэманстравалі, што разнастайная раслінная ежа — гародніна, садавіна, зеляніна — найлепшая для здароўя чалавека.

Багатая насычанымі тлушчамі карнівор-дыета можа выклікаць павышэнне ўзроўню дрэннага халестэрыну, што можа справакаваць сардэчна-сасудзістыя захворванні.

Празмернае спажыванне чырвонага і перапрацаванага мяса дактары звязваюць з павышанай рызыкай шэрагу захворванняў, у тым ліку раку кішэчніка, малочнай залозы, тоўстай кішкі. Акрамя таго, дыета з высокім утрыманнем натрыю можа прывесці да праблем з ныркамі і павышэння артэрыяльнага ціску.

Павялічыць

Спецыялісты не рэкамендуюць карніворную дыету дзецям, падлеткам, цяжарным і кормячым жанчынам, пажылым людзям і асобам з хранічнымі захворваннямі. Яна можа быць патэнцыйна рызыкоўнай для людзей з павышаным халестэрынам, гіпертаніяй, падаграй, атлусценнем з-за высокага ўтрымання жывёльных тлушчаў і адсутнасці клятчаткі.

Што тычыцца цукровага дыябету, то карнівор-дыета можа дапамагчы стабілізаваць узровень цукру ў крыві ў некаторых людзей за кошт амаль поўнай адсутнасці вугляводаў, але адсутнасць клятчаткі і патэнцыйны перакос у бок тлушчаў могуць ускладняць кантроль дыябету ў доўгатэрміновай перспектыве.

Дык есці ці не?

Спецыялісты адзначаюць, што прыхільнікі карнівор-дыеты, спасылаючыся на лад жыцця нашых продкаў-паляўнічых, забываюцца, што тыя таксама актыўна займаліся збіральніцтвам. Таму ўяўленне пра вяртанне да «першабытнай натуральнасці» выглядае аднабакова і недакладна.

Тое, што нізкавугляводнае харчаванне і адмова ад цукру і крухмалу дапамагаюць скінуць вагу, — навукова даказана. Але той, хто доўга жыве ў рэжыме «нуль вугляводаў» і адмаўляецца ад гародніны, цэльных злакаў і бабовых на карысць мяса, каўбасы і тлушчу, — свядома ідзе на рызыку.

Павялічыць

Дыетолагі адзначаюць: найлепшая дыета — гэта збалансаванае харчаванне, якое ўключае разнастайныя прадукты і забяспечвае арганізм неабходнымі пажыўнымі рэчывамі.

Варта памятаць, што рэакцыя на дыету індывідуальная: тое, што дапамагае аднаму, можа быць неэфектыўным для іншага. Таму перш чым змяняць рацыён, пажадана параіцца з доктарам або дыетолагам, каб пераканацца, што арганізм атрымлівае ўсё неабходнае.

• 0
• 0
• 0
• 1
• 1
• 0
• 0
• 0