Да 1 лістапада штрафаваць за парушэнне новых правіл маркіроўкі тавараў не будуць
З 1 ліпеня 2025 года ў Беларусі пачалі дзейнічаць новыя правілы па счытванні маркіроўкі тавараў, але многія крамы не паспелі да гэтага падрыхтавацца. Каб не штрафаваць прадпрыемствы, улады вырашылі даць ім час на адаптацыю: да 1 лістапада правяраць будуць, але штрафаваць — не, піша Office Life.
Як патлумачылі падчас семінара ў Міністэрстве антыманапольнага рэгулявання і гандлю, з 1 ліпеня ўсе гандлёвыя аб’екты павінны былі працаваць з новымі касавымі апаратамі і выконваць патрабаванні па маркіроўцы. Аднак з гэтым узніклі цяжкасці, асабліва пры счытванні ўніфікаваных кантрольных знакаў.
У выніку было прынята рашэнне пра спрошчаныя правілы: цяпер для некаторых тавараў (напрыклад, сокаў, кансерваў, напояў) дастаткова счытваць толькі штрыхкод. Калі няма магчымасці весці падрабязны ўлік, а ў краме прадаюцца толькі гэтыя тавары — можна проста ўводзіць суму пакупкі.
Што да тавараў, якія маркіруюцца спецыяльнымі кодамі (DataMatrix), напрыклад, малочнай прадукцыі, абутку, адзення, шынаў — то тут патрабаванні засталіся. Іх трэба прадаваць паасобку, з абавязковым счытваннем кода і ўлікам.
Да 1 лістапада дзейнічае тэставы рэжым: калі з тэхнічных прычын немагчыма выконваць правілы (маркіроўка пашкоджаная, не счытваецца і г.д.) — штрафу не будзе. Гэта зроблена, каб гандаль мог прывыкнуць да новай сістэмы і паведаміць пра праблемы.
Таксама разглядаюцца ідэі аб спрошчанай маркіроўцы для ўпакоўкі, каб не трэба было счытваць кожны ёгурт або бутэльку паасобку. Але на рэалізацыю такіх зменаў можа спатрэбіцца некалькі месяцаў.
У Беларусі спрасцілі працэдуру продажу тавараў з падвойнымі кодамі маркіроўкі
«Давялося сыр на касе пакінуць». Як беларусы рэагуюць на ноу-хау з падвойнай маркіроўкай тавараў
З 1 ліпеня ва ўсіх крамах запрацуюць новыя правілы — тлумачым, як цяпер рабіць пакупкі
Падаткавікі паведамілі, на якія тавары будуць уводзіць маркіроўку
Каментары