«Гэта не самы прывабны варыянт». Што думаюць беларусы пра ўвядзенне Грузіяй трохгадовага ДНЖ для айцішнікаў
Днямі стала вядома, што Грузія мае намер увесці ДНЖ з трохгадовым тэрмінам для ІТ-спецыялістаў. У тэматычных чатах, дзе ёсць прадстаўнікі Беларусі, жыва абмяркоўваюць гэтыя змены. Некаторыя беларусы кажуць, што будуць чакаць гэтую магчымасць, каб легалізавацца ў краіне. У той жа час ёсць і скептычныя меркаванні з нагоды гэтага закону, піша «Белсат».
Адзін з карыстальнікаў дзівіцца, што ў гэтага закону фактычна з прывабных бакоў — толькі больш доўгі тэрмін ДНЖ: адразу на тры гады. Паводле цяперашніх законаў ДНЖ выдаецца ад 6 да 12 месяцаў.
Другі карыстальнік адзначае, што, на ягоны погляд, паводле новага закону будзе «пагаршэнне ўмоў», бо цяпер дастаткова для атрымання ДНЖ «паказаць» абарот у 50 тысячаў лары (больш за 18 тысячаў даляраў). Згодна з новым законам, гадавы даход павінны быць не меншы за 25 тысяч даляраў.
Што да атрымання ДНЖ на членаў ся'мі, іншы карыстальнік таксама выказвае меркаванне, што зараз з гэтым няма вялікай праблемы:
«На сённяшні дзень ДНЖ робіце на сябе як асноўны заяўнік (падстава — ІП з абаротам 50 тысяч лары), атрымліваеце картку і на наступны дзень можна падаваць жонку, для яе пакет дакументаў зусім просты», — піша карыстальнік.
Крытычна ацэньваюць гэты законапраект і беларусы, якія не так даўно змянілі месца жыхарства з Грузіі на краіны Еўрасаюза.
«Гэта не самы прывабны варыянт. У суме агулам там ДНЖ толькі на 12 гадоў? А што далей? Грамадзянства не атрымаеш. Навошта тады? Ну, калі толькі хочацца проста пажыць у Грузіі для разнастайнасці», — кажа суразмоўца «Белсата».
Такой магчымасцю, падкрэслівае суразмоўца, на жаль, не змогуць скарыстацца беларусы, якія зазналі пераслед беларускіх уладаў. Акрамя таго, ёсць яшчэ адзін аспект, які нельга скідваць з рахункаў: выязджаючы з Грузіі на візаран (абнуленне візы), не заўсёды можна вярнуцца назад у краіну.
«Для «палітычных» і тых, хто не можа мяняць пашпарт у Беларусі, адразу міма. І яшчэ заўсёды вісіць рызыка, што цябе не ўпусцяць у краіну, бо ДНЖ, як паказвае практыка, не гарантыя», — кажа суразмоўца.
Сапраўды, ужо было некалькі выпадкаў, калі беларусы пасля кароткачасовага выезду з краіны для абнулення легальнага тэрміну знаходжання (візарану) сутыкаліся з тым, што іх не пускаюць назад у Грузію. Такі выпадак адбыўся 8 траўня з беларускім актывістам Змітром Грынкевічам. Здараліся такія выпадкі і раней, яшчэ ў 2022 і 2023 гадах.
На думку праваабаронцы Рамана Кісляка, візаран — «гэта заўсёды латарэя», бо грузінскія ўлады могуць не ўпусціць пасля выезду назад. А абскарджанне потым займае гады.
Адзін з удзельнікаў чата ў Грузіі таксама выказаў меркаванне, што ўвядзенне новага закона можа адбывацца на фоне жадання грузінскіх уладаў зрабіць больш строгім бязвізавы рэжым для прыезджых: «То-бок увядуць гэты ДНЖ, а таму скароцяць бязвіз да паўгода ці яшчэ менш».
Насамрэч грузінскія ўлады пакуль такіх намераў не выказвалі, прынамсі для турыстаў з Беларусі. У той жа час з 16 траўня быў прыняты закон, які ўводзіць больш жорсткія правілы бязвізавага ўезду для грамадзянаў 17 краін з высокай рызыкай міграцыі. Беларусі сярод іх няма. Пакуль.
«Грузія закрываецца». Гутарка з беларусам, які пасля візарану захрас у Арменіі
За пяць гадоў абароны ў Грузіі папрасіла больш за 70 беларусаў, тром дзясяткам ужо адмовілі
Грузінскі банк адмовіў беларусцы ў правядзенні плацяжу. Тая выклікала паліцыю — і дабілася свайго
Грузія цалкам забараніла рээкспарт аўто ў Расію і Беларусь. Што гэта азначае для беларусаў на практыцы?
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары