Вывучэнне дакументаў дзяржаўных закупак засведчыла, што «Белтелерадыёкампанія», галоўны дзяржаўны медыяхолдынг Беларусі, штогод выдаткоўвае мільёны бюджэтных рублёў на трансляцыю прапаганды на розных кантынентах, піша «Бюро».
З 2022 года кампанія набывае паслугі спадарожнікавай сувязі для распаўсюджвання тэлепраграмы «Беларусь 24» і радыёпраграмы «Беларусь». Сярод пастаўшчыкоў — расійскія кампаніі, азербайджанскае касмічнае агенцтва «Азеркосмас» і беларускі завод электрамеханікі.
У 2025 годзе ўжо аплачана трансляцыя кантэнту:
- па ўсёй тэрыторыі Расіі;
- у Цэнтральнай і Заходняй Азіі (у тым ліку поўны ахоп Азербайджана, Арменіі і Грузіі);
- у Заходняй, Усходняй, Паўночнай (з абавязковым пакрыццём Вялікабрытаніі, Ірландыі, Латвіі, Літвы і Эстоніі) і Паўднёвай Еўропе (з поўным пакрыццём Сербіі);
- у Паўднёвай Амерыцы і краінах Карыбскага басейна;
- у розных рэгіёнах Афрыкі, у тым ліку ў Зімбабвэ.
На сайце канала «Беларусь 24» заяўляецца, што вяшчанне вядзецца ў больш чым 170 краінах свету.
Пры гэтым «Белтелерадыёкампанія» патрабуе, каб спадарожнікавы сігнал кантралявалі толькі кампаніі з краін, што не прызнаныя «недружалюбнымі» да Беларусі. Але трансляцыя канала ў гэтых саміх «недружалюбных» краінах усё адно з'яўляецца абавязковай.
Па стане на 2025 год заключана кантрактаў больш як на 2 мільёны беларускіх рублёў (прыкладна 550 тысяч еўра). Найбольш дарагое вяшчанне — у Расію (амаль 700 тысяч рублёў), у Еўропу і Азію — каля 780 тысяч, а ў Паўднёвую Амерыку, Карыбы і Афрыку — прыкладна 565 тысяч рублёў. Усё гэта фінансуецца з бюджэту.
З 2022 па 2025 год дзяржкампанія выдаткавала на міжнароднае вяшчанне амаль 8 мільёнаў беларускіх рублёў, або каля 2,5 мільёна еўра.
Цяпер чытаюць
Мінскі школьнік праспаў прыпынак. Але кіроўца аўтобуса давёз яго дадому!3
Мінскі школьнік праспаў прыпынак. Але кіроўца аўтобуса давёз яго дадому!
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку2424
Каментары