Падарожнік з Казахстана расказаў, як прарываўся праз мяжу Беларусі і ЕС. Атрымалася толькі з трэцяй спробы
Беларусы ўжо прызвычаіліся, што трапіць на машыне ў Еўрасаюз не так проста, як гэта было раней. Аднак для падарожнікаў, якія едуць аўтамабілем з Алматы ў Прагу, многія звыклыя для нас рэчы аказаліся непрыемным сюрпрызам.
Чарга на двое сутак і нюансы са страхоўкай
Падарожнік з Алматы (Казахстан) Павел расказаў у відэа, што калі дабраўся да беларуска-польскай мяжы, то даведаўся, што чарга расцягнулася на двое сутак. Аднак яму і яго сям'і пашанцавала — бо яны ехалі разам з двума дзецьмі, адзін з якіх быў малодшы за тры гады. А значыць, стаяць ў чарзе суткамі ім не давялося.
Як і ўсе іншыя, яны аплацілі 12 рублёў за рэгістрацыю ў электроннай чарзе, пошліну на выезд памерам 43 рублі і заехалі ў пункт пропуску з беларускага боку.
Першай неспадзяванкай для турыстаў аказаўся той факт, што трапіць у Польшчу можна толькі ўжо маючы еўрапейскую страхоўку на аўтамабіль, а набыць яе ў Беларусі немагчыма.
«Думаю, ну заеду ў Польшчу — там куплю, як заўсёды гэта і рабілася. Але так не атрымліваецца. Каб заехаць у Еўропу, ужо патрэбна страхоўка, а каб купіць страхоўку, ты ўжо павінен быць у Еўропе. Лагічна, так?» — з іроніяй кажа казахстанец.
Праз адсутнасць страхоўкі ім давялося вяртацца ў Брэст і ночыць у гатэлі.
Вырашыць праблему са страхоўкай ім дапамаглі сябры з Прагі. Абышлася яна ім прыкладна ў 100 даляраў на два месяцы.
Але праехаць у Польшчу ім гэта ўсё адно не дапамагло.
«Прапускаем толькі еўрапейцаў і беларусаў»
«Прайшлі беларусаў, пад’язджаем да Польшчы, яны бачаць нашы нумары і кажуць: «Казахі — разварочвайцеся і едзьце ў Літву, бо тут мы прапускаем толькі еўрапейцаў і беларусаў».
На другую спробу трапіць у Польшчу сям'я страціла пяць гадзін. Палякі іх развярнулі, а на ўездзе ў Беларусь ім усё адно давялося прайсці дэзынфекцыю аўтамабіля за 2 рублі, што таксама здзівіла падарожнікаў з Казахстана.
Яшчэ праз пяць гадзін сям’я з двума дзецьмі дабралася да «Беняконяў», дзе зноў заплаціла 12 рублёў за рэгістрацыю ў электроннай чарзе і 43 рублі за выезд за мяжу.
Нягледзячы на тое, што яны не стаялі ў чарзе з беларускага боку, на праходжанне беларуска-літоўскай мяжы ў іх сышло каля 7 гадзін.
Дзе тэхагляд?
Трапіць у Літву ў іх атрымалася, але, як распавёў мужчына, і там не абышлося без сюрпрызаў, бо на літоўскім баку пасля праверкі пашпартоў і страхоўкі ў яго спыталі пра тэхагляд на аўто.
Аднак дакумента, які б пацвярджаў факт яго праходжання, у казахстанца быць не магло, паколькі ў Казахстане аўтамабілі, маладзейшыя за 7 гадоў, якія выкарыстоўваюцца ў прыватных мэтах, тэхагляд не праходзяць.
Мужчына прызнаўся, што праз адсутнасць тэхагляду яму давялося ўключыць сваё абаянне і загаворваць супрацоўніка на мяжы, адцягваючы ўвагу і расказваючы літоўцу пра тое, на якім цікавым кітайскім аўто яны едуць.
«Увагу адцягваю, і ён у мяне пытае: «А машына якога года?» Я кажу — 2025. «А, ну тады ў цябе 100% тэхагляд у любым выпадку ёсць. Нават правяраць не буду».
Прыгоды на расійска-беларускай мяжы
Адметна, што са складанасцямі пры праходжанні мяжы казахстанцы сутыкнуліся і на выездзе з Расіі. Допыт на выездзе з Расіі цягнуўся каля дзвюх гадзін.
Мужчына расказаў, што пасля стандартных пытанняў у яго пачалі пытаць, хто ён па нацыянальнасці, якой веры. Не абышлося і без праверкі тэлефона.
«А потым самае цікавае — забірае тэлефон і пачынае праглядваць усе перапіскі, усе фота».
Цяпер чытаюць
«У майго 21 сантыметр — дзесяць базавых далі». Беларусы ў тыктоку жартуюць з новых правілаў ад чыноўнікаў7
Каментары