Каля рэзідэнцыі Лукашэнкі на машыну раптам зваліўся трос і прарэзаў яе наскрозь
На мінскай вуліцы Арлоўскай, зусім побач з Палацам Незалежнасці, адбыўся незвычайны дарожны інцыдэнт з электрамабілем Geely E8. Вечарам у нядзелю яго ўладальнік спакойна рухаўся ў бок праспекта Пераможцаў, калі раптам здарыўся моцны ўдар, пачуўся скрыгат і з-пад машыны паляцелі іскры. Аказалася, што аўто зачапіла і наматала на сябе металічны трос, як усё адно рыбіна трапіла на блешню, піша «Анлайнер».
Пра здарэнне расказаў чытач «Анлайнера» Аляксей, які ў той момант быў за рулём. Ён кажа, што ехаў з цесцем з хуткасцю каля 60 км/г, а трос з’явіўся літаральна зніадкуль. Мужчына так і не зразумеў, ці ён упаў зверху, ці ўжо ляжаў на дарозе і намотваўся на кола.
Усё адбылося за лічаныя секунды: машына рэзка спынілася, прычым у канцы тармажэння яе фактычна затрымаў сам трос. Ззаду ехала Tesla, відэарэгістратар якой зафіксаваў момант здарэння — на кадрах відаць нават іскры.
Аляксей прызнаецца, што быў у шоку і перш за ўсё падумаў пра тое, каб як мага хутчэй пакінуць электрамабіль, баючыся ўзгарання або выбуху. Вялікім шанцаваннем ён лічыць тое, што ў іх ніхто не ўрэзаўся, хоць сітуацыя на дарозе тады была вельмі напружаная.
Паступова стала зразумела, што магло здарыцца. На сустрэчнай паласе ад’язджаў ад прыпынку тралейбус, і ў гэты момант на кантактнай сетцы ўзнікла ўспышка. Верагодна, абарваўся трос, які служыць расцяжкай паміж лініямі над рознымі бакамі вуліцы. Гэты трос і зачапіў Geely. Па словах Аляксея, зверху яшчэ нейкі час іскрыла, а сітуацыя выглядала вельмі небяспечнай.
У выніку трос не вытрымаў вагі машыны і парваўся, але паспеў пашкодзіць пярэднюю частку аўто прыкладна на 25 сантыметраў. Кіроўца выклікаў ДАІ, аднак адзначае, што ў стрэсавай сітуацыі яму задавалі шмат фармальных пытанняў, што толькі ўзмацняла напружанне. Пазней прыехалі камунальныя службы, але, па словах Аляксея, яны адрэагавалі абыякава, сказаўшы, што «такое бывае з усімі». Гэта яшчэ больш яго абурыла.
Камунальнікі пачалі здымаць з троса розныя элементы, нешта адразалі, здымалі спружыны. ДАІ аформіла здарэнне як ДТЗ без вінаватых і выдала даведку для страхавой. Пасля ўсе паехалі, а машына засталася з тросам, які зачапіўся за падвеску. Толькі з дапамогай сяброў, дамкрата і знятага кола ўдалося вызваліць аўто і эвакуяваць яго.
У Аляксея ёсць каска, таму цяпер ён чакае рашэння страхавой. Машына новая, 2025 года выпуску, з невялікім прабегам, але ўжо вядома, што ёсць праблемы з запчасткамі. Акрамя відавочных пашкоджанняў, пацярпелі фара і шкляны дах. Кіроўца не выключае, што кошт рамонту можа аказацца супастаўным з коштам самога аўтамабіля.
Нягледзячы на ўсё, Аляксей адзначае, што галоўнае — усе засталіся жывыя. Ён падкрэслівае, што хуткасць была адносна невялікая, бо ўвогуле рух на гэтай вуліцы часта бывае значна больш інтэнсіўным. Але сам факт, што падобная сітуацыя ўвогуле магчымая, ён называе шакавальным.
Цяпер чытаюць
Ціханоўская: Дзеці не пераехалі ў ЗША, а проста часова будуць з татам дзеля бяспекі39
Каментары