Эканамічны суд Віцебскай вобласці прызнаў СТАА «Белвест» эканамічна неплацежаздольным, у дачыненні да прадпрыемства ўведзеная працэдура саніравання. Пра гэта паведамілі ў прэс-службе Вярхоўнага суда, піша Office Life.
Сумеснае прадпрыемства «Белвест» было заснавана ў 1988 годзе ў Віцебску пры ўдзеле нямецкага канцэрна Salamander — гэта першае сумеснае прадпрыемства з заходнім капіталам на тэрыторыі тады яшчэ савецкай Беларусі. З 2003 года сярод заснавальнікаў былі канцэрн «Беллегпрам» і расійскае ЗАТ «Палітэкс», якое ў 2011 годзе змяніла ТАА «Інвестпрам». У 2019 годзе дзяржаўную долю ў памеры 55% прадалі ТАА «Група Белвест», астатнія 45% засталіся ў расіян.
З матэрыялаў справы вынікае, што рызыка банкруцтва рэзка ўзрасла з высокай да крытычнай за першыя сем месяцаў мінулага года з-за росту пратэрмінаваных крэдыторскіх абавязацельстваў. У 2025 годзе ў «Белвесце» распрацавалі меры па папярэджанню неплацежаздольнасці і банкруцтва, галоўны эфект разлічвалі атрымаць праз рэалізацыю фінансавых мерапрыемстваў. Аднак перамовы з банкамі аб пераглядзе тэрмінаў выплаты працэнтаў па крэдытах не далі выніку.
Улетку Віцебскі аблвыканкам прызначыў на прадпрыемства знешняга ўпраўляючага, пры гэтым менеджмент «Белвеста» застаўся на месцы. Паводле слоў намесніцы старшыні аблвыканкама Анжалікі Нікіцінай, за летнія месяцы ўдалося пагасіць запазычанасць па падатках і зборах, а таксама перад ФСАН, стабілізаваць выкананне цяперашніх фінансавых абавязацельстваў, у першую чаргу перад работнікамі. Аднак накопленыя запазычанасці стваралі праблемы ў аперацыйнай дзейнасці і блакавалі развіццё.
У верасні мінулага года вытворца абутку сам звярнуўся ў суд з заявай аб неплацежаздольнасці. Сярод прыкмет назвалі зніжэнне аб’ёмаў вытворчасці, рост складскіх запасаў, павелічэнне запазычанасці да 259 мільёнаў рублёў і немагчымасць яго абслугоўвання.
Па выканаўчых дакументах прадпрыемства павінна выплаціць больш за 160 мільёнаў беларускіх рублёў, 2,5 тысячы расійскіх рублёў і 1,8 мільёна юаняў. Пры гэтым, як вынікае з матэрыялаў справы, кошт маёмасці даўжніка перавышае 409,6 мільёна рублёў. У выніку 15 студзеня гэтага года Эканамічны суд Віцебскай вобласці прызнаў «Белвест» эканамічна неплацежаздольным і прызначыў працэдуру саніравання на тры гады.
На «Белвесце» разрэзалі боты, каб паказаць перавагу беларускага абутку
Суд распачаў справу аб эканамічнай неплацежаздольнасці «Белвеста»
«Дорага і няякасна». Беларусы скардзяцца на няякасны абутак ад «Белвеста» і праблемы з вяртаннем грошай
«Адрадзіць савецкія легендарныя аб'ёмы». Гродзенскую абутковую фабрыку «Нёман» перадалі пад кіраванне «Белвеста»
Цяпер чытаюць
Хто прадаў кватэру ў «Маяку Мінска» зніклай Мельнікавай? Такога чалавека не існуе19
Каментары