Маці траіх дзяцей просіць Лукашэнку вярнуць іх з прытулку. Чыноўнікі патлумачылі, чаму ў яе не атрымалася
Беларуска Айшэ Пілумян звярнулася да Аляксандра Лукашэнкі з просьбай дапамагчы вярнуць ёй трох малых дзяцей, якіх у сакавіку забралі пад дзяржаўную апеку. Апошнія гады тыя жылі з яе былым мужам у Зэльвенскім раёне, але бацька стаў піць. Па словах Айшэ, прымаючы канчатковае рашэнне, чыноўнікі не прапанавалі ёй забраць дзяцей да сябе ў Мінск і абмежавалі ў правах, хоць на сёння яна «мае ўсе ўмовы» для іх выхавання.
«Аляксандр Рыгоравіч, я адэкватны чалавек, які не п’е. Калі ласка, дапамажыце мне вярнуць маіх дзяцей. Яны не павінны былі трапіць у прытулак, пры тым што ў іх ёсць маці», — маліла жанчына. Ролік з яе зваротам сабраў шмат праглядаў і каментароў, і чыноўнікі адрэагавалі на яго праз раённую прэсу.
Загадчыца сектара сацыяльнай і арганізацыйна-педагагічнай работы аддзела адукацыі Зэльвенскага райвыканкама Вольга Вежнавец расказала, што гісторыя сям’і ідзе каранямі ў 2020 год, калі адбыўся развод. Айшэ Пілумян прасіла, каб дзецям далі права жыць з ёй. «Але падчас судовага разбіральніцтва яна ад сваіх патрабаванняў адмовілася, тым самым даўшы згоду на пражыванне дзяцей з бацькам».
Далі слова і намесніцы дырэктара Дзярэчынскай сярэдняй школы Наталлі Кароль, у якой вучыліся дзеці. У відэа яна кажа, што маці не цікавілася іх навучаннем, не наведвала бацькоўскія сходы.
Пры гэтым дырэктарка школы Ірына Крыштопчык удакладняе, што Айшэ ў снежні 2024 года ўсё ж выходзіла з ёй на сувязь. А пасля нават прыехала на ранішнік і бацькоўскі сход, дзе размаўляла з класнай кіраўніцай, апраўдваючы сваю ранейшую адсутнасць у жыцці школьнікаў працай і навучаннем у Мінску, у якія ўкладалася для адной мэты: аднойчы мець умовы для аб’яднання з дзецьмі.
«Але надалей яна школу не наведвала», — справаздачыцца дырэктарка.
«12 сакавіка было прынята рашэнне аб тым, што трое дзяцей маюць патрэбу ў дзяржаўнай абароне і змяшчэнні іх на дзяржаўнае забеспячэнне. Падставай паслужылі факты ўжывання бацькам спіртных напояў, а таксама самаўхіленне маці ад абавязкаў па выхаванні дзяцей», — падсумавалі ў камісіі па справах непаўналетніх Зэльвенскага райвыканкама.
Айшэ Палумян з такім рашэннем не згодная і плануе далей змагацца за дзяцей. Пакуль жа яна наведвае іх у прытулку.
«Я ведаю, што тое, што я рэдка прыязджала да дзяцей цягам гэтага часу [з 2020 года], гэта дрэнна. І тое, што я ўхілялася ад аліментаў, гэта дрэнна. Тут я вінаватая. Але дзяцей у бацькі ўсё адно б аднойчы забралі, і яны б апынуліся ў прытулку. І калі б я не ўкладала ўсе свае сілы і сродкі ў навучанне, у мяне б не было магчымасці за іх змагацца», — упэўненая Айшэ, якая працуе майстрыхай па манікюры.
Цяпер чытаюць
Магілёў, Віцебск і Гомель удалося далучыць да БССР толькі таму, што Масква такім чынам хацела спакусіць Заходнюю Беларусь — апублікаваныя дакументы4848
Магілёў, Віцебск і Гомель удалося далучыць да БССР толькі таму, што Масква такім чынам хацела спакусіць Заходнюю Беларусь — апублікаваныя дакументы48
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку6565
Каментары