Куды і як выехаць з Мінска на дзень, каб адпачыць? Пяць ідэй
Адпачыць на вялікія выходныя можна не закладваючы на тое вялікіх грошай і шмат часу. Усяго за адзін дзень можна з'ездзіць у шэраг цікавых месцаў недалёка ад Мінска. «Наша Ніва» склала спіс з пяці такіх ідэй — на выпадак, калі Ратамку, Вязынку і Дудудкі вы ўжо бачылі.
Комплекс Чапскіх
За 18 кіламетраў ад Мінска месціцца Прылуцкі палацава-паркавы комплекс. Гэта сядзіба XVIII стагоддзя, закладзеная на месцы былога манастыра. Апошнім прыватным уладальнікам парку і палаца быў род Чапскіх, які пакінуў дом у 1917 годзе.
Цяпер у палацы дзейнічае дзяржаўны Інстытут аховы раслін — даследчае прадпрыемства НАН Беларусі. Вакол — маляўнічыя сцежкі, возера і гаспадарчыя будынкі.
З Мінска да комплексу Чапскіх можна дабрацца за 25 хвілін на машыне ці за гадзіну на грамадскім транспарце. Для апошняга трэба сесці на №323 ці №429 аўтобус і даехаць да прыпынку «Прылукі». Альбо выкарыстаць маршрутку №1131, якая едзе з Цэнтральнага аўтавакзала.
Натурная пляцоўка «Беларусьфільма» каля Смалявічаў
Недалёка ад Смалявічаў ёсць натурная пляцоўка «Беларусьфільма» — месца з антуражнымі домікамі каля возера Каменка. Раён, які выкарыстоўвае кінастудыя, мясцовыя жыхары называюць проста — «Смалявуд».
Тут можна не толькі паблукаць па лесе і паглядзець на ваду, але і спыніцца на ноч у адмысловым гатэлі. Даехаць да пляцоўкі з Мінска зойме каля 45 хвілін на машыне і прыкладна 1,5 гадзіны на грамадскім транспарце — залежыць ад раскладу.
Калі ў вас няма машыны, ёсць два шляхі: даехаць да Смалявічаў на электрычцы і там сесці на аўтобус №410 да прыпынку «Малая Каменка» ці з Мінска злавіць маршрутку да «Малой Каменкі» ці «Крывой Бярозы» (кірунак на Жодзіна). Ад прыпынкаў да кінапляцоўкі трэба будзе прайсціся пешшу.
Экасцежка «Святыя крыніцы»
За 40 кіламетраў ад Мінска месціцца экалагічная сцежка «Святыя крыніцы». Працягласць сцежкі — 350 метраў, на шляху — альтанкі, скульптуры з дрэва і крыніцы, ваду з якіх можна піць.
Каб дабрацца туды з Мінска, трэба ці праехаць на машыне, ці сесці ў маршрутку №1485ш — яна давязе вас да Бахметаўкі, а адтуль трэба будзе прайсціся каля 3,5 кіламетра. На пачатку экасцежкі будзе бачны ўказальнік з асноўнай інфармацыяй пра «Святыя крыніцы».
Этнаграфічны комплекс «Млын» у Заслаўі
Музей пад адкрытым небам расказвае пра жыццё Заслаўя ў пачатку ХХ стагоддзя. Асноўны аб'ект — паравы млын — пабудавалі ў 1910 годзе на сродкі заможнага жыхара горада Мяхедка-Савіцкага.
Тут жа можна наведаць Дзіцячы музей міфалогіі і лесу, музей «ДОТ», адзіны ў Беларусі Музей маляванкі і іншыя экспазіцыі.
Паглядзець на комплекс удасца, калі праехаць машынай да Заслаўя ці злавіўшы маршрутку, напрыклад, №499. Дарэчы, на шляху можаце паспець яшчэ раз зазірнуць у Ратамку.
Гідрапарк «Сасновы Бор»
За 50 кіламетраў ад Мінска, каля Радашковічаў, можна адпачыць пад гукі вады. Гідрапарк «Сасновы бор» — гэта месца з каналамі, вадаспадамі і падвеснымі мастамі.
Даехаць да яго проста не толькі на машыне, але і аўтобусам — па маршрутах №432 ці №414. Выйсці трэба на прыпынку «Санаторый «Сасновы Бор».
У самім санаторыі пры жаданні можна і забраніраваць адпачынак. Двухмесны нумар у асноўным корпусе будзе каштаваць 132 рублі ў суткі.
Каментары
Дарэчы ў Еўропе можна ў кожнай вёсцы знайсці нешта цікавае для турызму на адзін дзень. І гатэль будзе, і крама, і карчма дзе можна нармалёва паесці.
>у Заслаўе - у Заслаўі
>У самой санаторыі - У самім санаторыі