Беларусы выкупілі пад Мінскам дзевяць участкаў, каб жыць цеснай кампаніяй. Адно месца яшчэ вакантнае
Беларуская архітэктурная студыя ZROBIM architects прэзентавала свой новы праект — экалагічны міні-пасёлак на дзевяць дамоў недалёка ад Мінска. Яго фішкай стала спалучэнне этнічнага стылю (высокія дахі, драніца) і сучаснай архітэктуры. Але самая цікавая дэталь праекта, бадай, тое, што пасёлак будуецца найперш для сваіх — па плане ў ім будуць жыць сябры і сваякі. Гэткае прачытанне хутара на новы лад.
Геаграфічна міні-пасёлак ад ZROBIM architects узводзіцца ў вёсцы Карпілаўка, што ў Лагойскім раёне. Побач — Купалаўскі запаведнік. Само месца прасякнута гісторыяй: так, у гэтых краях месцілася сядзіба пісьменніка Ядвігіна Ш., да якога ў госці прыязджаў Янка Купала. Лічыцца, што менавіта там Купала быў перакананы ў тым, што варта пачаць пісаць па-беларуску.
«Гэта месца, якое мы задумалі для сябе і сваіх сяброў, таму тут шмат свабоды і творчасці, у ім мы ўвасобілі свае даўнія ідэі пра тое, як можа выглядаць хата ў сучасным беларускім стылі», — прэзентуе праект студыя, якая выкупіла пад свае мары дзевяць участкаў, кожны — памерам каля 12-14 сотак.
Адметна, што за пяць хвілін язды ад гэтага месца адзін з заснавальнікаў ZROBIM architects Андрусь Бездар раней ужо пабудаваў сабе дом. І калі студыі прапанавалі выкупіць дзевяць участкаў побач, пазл склаўся:
«Я заўсёды марыў пра свой пасёлак, мары мусяць спраўджвацца. Я прапанаваў выкупіць зямлю сваім сваякам, сябрам, каб жыць разам. Мястэчка будзе мець назву «Наша Новая Зямля»», — каментуе Бездар, іранічна адзначаючы, што разумее, што паэму «Новая зямля» напісаў Якуб Колас, а не Янка Купала.
Тутэйшая зямля для архітэктара энергетычна моцная не толькі гістарычнымі цікавосткамі, але таксама тым, што менавіта тут, пад вялікім 600-гадовым дубам, ён зрабіў прапанову будучай жонцы.
Аснова дамоў — лёгкія стальныя канструкцыі, якія будуць залівацца пенабетонам. Знешне ж ён будзе аздоблены дрэвам, у прыватнасці, драніцай, як тое рабілі нашы продкі. Дзякуючы такому рашэнню забудова будзе глядзецца ўтульна, не выбіваючыся з прыроднага ландшафту. Між іншым наўпрост з тэрыторыі мястэчка людзі змогуць выйсці ў запаведны лес з пешымі сцежкамі для шпацыроў.
У большасці дамоў запланаваныя высокія дахі з комінамі і вялікімі вокнамі на іх — святла тут дакладна не будзе мала. Не абыдуцца будучыя гаспадары і без уласных саўны з джакузі.
Тут ужо зрабілі дарогу, па якой можна даехаць да ўчасткаў на аўто. Ацяпленне плануецца электрычнае: праз год у дамоў будзе ўласны цеплавы пункт.
Дарэчы, пакуль праект ствараўся, адзін з асноўных рухавікоў, яшчэ адзін заснавальнік ZROBIM architects Аляксей Караблёў пераехаў у ЗША, таму яго ўчастак вызваліўся. Ён яго цяпер прадае.
«Мы шукаем чалавека, які гатовы стаць часткай нашага кам’юніці», — анансаваў Аляксей. Кожны, хто марыць далучыцца да сфармаванай кампаніі на хутары, можа напісаць яму — кантакты архітэктар пакінуў у відэа.
«Пераапрануўся ў амапаўца і дырыжыраваў чорнай дубінкай». Адзін з заснавальнікаў «Вольнага хору» — пра акцыі ў гандлёвых цэнтрах у 2020‑м і працу ў філармоніі ў Літве55
Каментары