Наўроцкі: Украіна можа разлічваць на дапамогу, бо там, дзе б'юць маскаля — Польшча дапамагае
«Але таксама ў стратэгічных інтарэсах Польшчы — каб бандэраўскія сцягі не луналі ні ў Варшаве, ні ў Польшчы».
Прэзідэнт Польшчы Караль Наўроцкі ў прамове, прысвечанай гадавіне свайго знаходжання на пасадзе, адзначыў, што дапамога Украіне, у прыватнасці ў яе барацьбе з Расіяй, адпавядае стратэгічным інтарэсам Варшавы, але ў гістарычных пытаннях ён лічыць неабходным стаяць на сваім, паведамляе «Еўрапейская праўда».
У частцы прамовы, прысвечанай Украіне, Наўроцкі заявіў, што лічыць неабходным працягваць падтрымку Кіева ў барацьбе з расійскай агрэсіяй, бо поспех Украіны — у стратэгічных інтарэсах Польшчы.
«Інтарэс Польшчы — у тым, каб Украіна і ўкраінскія вайскоўцы як мага лепш спраўляліся з постсавецкай Расійскай Федэрацыяй і трымалі яе як мага далей ад Польшчы. Гэта відавочна, гэта дзяржаўная стратэгія Польшчы. Няхай забіваюць «саветаў», якія на іх напалі… У гэтым яны заўсёды могуць разлічваць на нашу дапамогу, бо там, дзе б'юць маскаля — Польшча дапамагае, нават калі непасрэдна не ўдзельнічае ў вайне. Гэта ў стратэгічных інтарэсах Польшчы», — сказаў Наўроцкі.
«Але таксама ў стратэгічных інтарэсах Польшчы — каб бандэраўскія сцягі не луналі ні ў Варшаве, ні ў Польшчы. Мы можам дапамагаць, і можам патрабаваць; мы можам супрацоўнічаць як партнёры і дасягнуць узаемаразумення па фундаментальных пытаннях… Мы будзем дапамагаць, але заўсёды са словамі: Польшча перш за ўсё, палякі перш за ўсё», — заявіў ён.
Каментары