Пяць фактаў пра новага прэм'ера Турчына — любіць баскетбол, працуе з 14 гадоў
Аляксандра Турчына, які апошнія гады быў кіраўніком Мінскай вобласці, прызначылі прэм'ер-міністрам замест Рамана Галоўчанкі. Што вядома пра яго біяграфію.
У школе любіў хімію і баскетбол
Турчыну 49 гадоў. Ён родам з Навагрудка. Яго маці была медыкам, бацька працаваў у адміністрацыі райвыканкама.
Аляксандр Турчын скончыў школу са срэбным медалём. Адзіная чацвёрка ў яго была па алгебры. Сам ён расказваў, што больш за ўсё любіў вывучаць хімію. Таксама захапляўся баскетболам, гэты від спорту больш за ўсё любіць і цяпер.
Дырэктар школы ў размове «Салідарнасцю» характарызавала яго як флегматыка, які вонкава мала змяніўся з юнацтва.
Падпрацоўваў з 14 гадоў
Будучы чыноўнік скончыў Беларускі дзяржаўны эканамічны ўніверсітэт.
У 14 гадоў ён уладкаваўся на прадпрыемства, дзе выпускалі аўтамабільныя фільтры. «Іх трэба было пакаваць у прамасленную паперу — гэта рыпенне згадваю і цяпер», — дзяліўся Турчын.
У родным Навагрудскім раёне працаваў загадчыкам крамы калгаса «Авангард», падатковым інспектарам. Пазней стаў галоўным кантралёрам-рэвізорам Міністэрства фінансаў па Навагрудскім раёне і Гродзенскай вобласці.
У 2004—2010 гадах быў спачатку начальнікам фінансавага аддзела, а затым намеснікам старшыні Карэліцкага райвыканкама.
«Я думаю, калі Турчын сышоў з раёна, усе пра гэта шкадавалі. Яго нешта хвалявала, ён перажываў за раён», — расказваў пра яго «Салідарнасці» дырэктар мясцовага прыватнага прадпрыемства.
Пазней Турчын — старшыня камітэта па эканоміцы Мінскага аблвыканкама (2010—2012), намеснік старшыні Мінскага аблвыканкама (2012-2015). У 2015—2016 быў памочнікам Лукашэнкі па Гомельскай вобласці. У 2016—2018 узначальваў Апарат Савета міністраў.
У 2018—2019 працаваў першым віцэ-прэм’ерам, а пасля кіраўніком Мінскай вобласці.
Ён апісваў свой графік губернатара: працоўны дзень пачынаецца ў 7.40, а завяршаецца каля 20.00, пры гэтым субота не адносіцца да ліку выходных.
Стаяў за дэкрэтам №7
Турчына называюць аўтарам ліберальнага дэкрэта №7 «Аб развіцці прадпрымальніцтва».
У яго добрыя адносіны з багатымі людзьмі краіны, такімі як гаспадар «Кароны» Павел Тапузідзіс.
Жонка таксама з Навагрудка
Жонка Турчына Іна таксама з Навагрудка.
А дачка чыноўніка Дар'я вучылася ў той жа навагрудскай школе №4, што і ён. Пасля скончыла Мінскі абласны ліцэй. Згодна з базай «Белпол», нейкі час працавала ў кампаніі «Патыё», якая валодае сеткай крамаў «Пяты элемент».
Меў рэпутацыю прарынкавага чыноўніка
Турчын меў рэпутацыю прыхільніка рыначнай эканомікі. Ён уваходзіць у Раду па развіцці прадпрымальніцтва.
«У нас няма жадання караць і раскулачваць бізнэс», — запэўніваў у 2018-м Турчын на міжнародным Кастрычніцкім эканамічным форуме (KEF). Але з таго часу сітуацыя ў краіне моцна змянілася.
Пасля выбараў 2020 года трапіў пад санкцыі Еўрасаюза, Швейцарыі і Вялікабрытаніі.
«Ніякай істотнай карэкціроўкі эканамічнага курсу не будзе», — заявіў Турчын адразу пасля прызначэння.
«Для мяне ён рыначнік, але канфарміст», — даў характарыстыку Турчыну адзін з беларускіх бізнэсоўцаў.
Цяпер чытаюць
Учора Мінск зноў затапіла. Чаму сталіца не гатовая да дажджоў?4
Каментары