Тэлевядоўца Уладзімір Салаўёў падхапіў тэму пра злітыя перапіскі Ксеніі Сабчак. Прапагандыст абвінаваціў заснавальніцу «Осторожно media» і яе маці, сенатарку Людмілу Нарусаву, у працы на «здраднікаў радзімы», Аляксея Навальнага і яго паплечнікаў, а таксама ў «абслугоўванні тых, хто існуе на грошы замежных спецслужбаў», заўважыла «Агентство».
Пра злітыя перапіскі Сабчак Салаўёў выказаўся ў пачатку выпуску «Нядзельнага вечара». Ён не назваў яе прозвішча, аднак з кантэксту выказвання зразумела, што Салаўёў меў на ўвазе менавіта Сабчак і Нарусаву.
Пра іх Салаўёў загаварыў у кантэксце саміту НАТА, які прайшоў на гэтым тыдні ў Турцыі. Тэлевядоўца згадаў заяву Уладзіміра Зяленскага пасля саміту пра тое, што імкненне Украіны завяршыць вайну мае «падтрымку не толькі сярод партнёраў у свеце, а таксама сярод атачэння Пуціна».
«Яны ведаюць адкуль? — спытаў Салаўёў. — Таму што высветлілася, што ў адной ізраільскай журналісткі цесныя сувязі з прадстаўнікамі бліжэйшага кола Зяленскага? Перагаворваюцца па тэлефоне, зліваюць інфармацыю?»
У злітых перапісках ёсць абмен паведамленнямі паміж «Сабчак» і «былым кіраўніком офіса прэзідэнта Украіны Андрэем Ермаком».
«А як паставіцца да гэтага — калі ва ўскрытай перапісцы раптам высвятляецца, што ў інтарэсах замежных агентаў, здраднікаў нашай радзімы, навальністаў, асабіста Навальнага дзейнічалі дзейны сенатар Расійскай Федэрацыі і яе дачка, пастаўляючы інфармацыю, верыфікуючы і абслугоўваючы тых, хто існаваў на грошы замежных спецслужбаў. Гэта нармальна? Гэта нармальна? Гэта не здрада нашай радзіме?»
Салаўёў заявіў, што «для гэтай сям’і было зроблена столькі, што яны павінны былі быць да труны абавязаны». Аднак, «яны пайшлі па шляху здрады, на мой погляд», — сказаў ён.
Тэлевядоўца абмовіўся: «Вядома, калі гэтая перапіска адпавядае рэчаіснасці, як і размова».
На заканчэнне каментара Салаўёў выказаў здагадку пра існаванне «змовы» ў атачэнні Уладзіміра Пуціна.
«Якую яшчэ інфармацыю яны збіралі і перадавалі? Пра каго яшчэ з кіраўнікоў нашай краіны? Якія яшчэ яны выконвалі даручэнні? І ад каго яны іх атрымлівалі? Што гэта за фармулёўка? «У бліжэйшым коле ёсць нехта». То-бок гэта змова?»
На гэтым тыдні былі абнародаваныя фрагменты, як сцвярджаецца, перапісак Ксеніі Сабчак з галоўрэдам «Осторожно, новости» Сяргеем Цітовым, галоўным падрадчыкам Крамля ў Telegram Крысцінай Патупчык і прадстаўніцай сям’і Барыса Ельцына Палінай Дзерыпаскай. У злітых «перапісках» таксама ёсць дыялогі, як вынікае з публікацый, з Ермаком, кіраўніком упраўлення грамадскіх праектаў адміністрацыі прэзідэнта Расіі Сяргеем Новікавым і кіраўніком прапагандысцкага АНА «Дыялог» Уладзімірам Табаком.
Сама Сабчак пасля першай уцечкі называла злітыя размовы «фэйкамі», аднак у перапісцы з рэдактарам «Агенцтва» яна не стала адказваць на пытанне пра тое, ці ўсе яе дыялогі былі сфальсіфікаваныя.
Каментары